Пентагон бүхэлдээ хөл толгой нь олдохгүй замбараагүй болж, Батлан хамгаалахын сайд Пит Хегсет ч албан тушаалдаа тэсч үлдэх төлөвгүй байгааг хэвлэлийн төлөөлөгч асан Жон Улльот хэллээ. Өнгөрсөн долоо хоногт албан тушаалаасаа огцорсон тэрбээр Пентагоныг "Барилга тэр чигээрээ Хегсетийн удирдлага дор эмх замбараагаа алдсан. Үйл ажиллагааны доголдол нь ерөнхийлөгчийн анхаарлыг ихээр сарниулж байна" гэжээ. Цагаан ордны дээд албан тушаалтнуудын групп чат задарсан хэргийг Пентагон хангалттай сайн шийдвэрлээгүй гэж тэр шүүмжилж байна. Гэсэн ч тэр Трампийн засаг захиргааны үндэсний аюулгүй байдлын бодлогыг дэмжсэн хэвээр байгаагаа хэлжээ.

Жон Улльотын хувьд бэйсболын домогт тамирчин Жэки Робинсоны цэргийн алба хаасантай холбоотой мэдээллийг албан ёсны цахим хуудаснаас устгасныхаа дараа халагдсан байна.

Пентагоны өөр гурван ч топ албан тушаалтан өнгөрсөн долоо хоногт халагдсан аж. Тэдгээр нь ахлах зөвлөх Дэн Калдвелл, Тамгын газрын дэд дарга Дэрин Селник, Батлан ​​хамгаалахын дэд сайдын ажлын албаны дарга Колин Карролл нар юм. Хегсэтийн ажлын албаны дарга Жо Каспер ч бас ойрын өдрүүдэд өөр албан тушаалд томилогдох төлөвтэй байна.