Сагсан бөмбөгийн дээд лигийн энэ улирлын финалын цуврал өчигдөр/2025.04.21/ эхэлсэн. Хэдий эхний тоглолтод Бишрэлт Металл баг хожсон ч тоглолтын үр дүнгээс илүүтэйгээр анхаарал татсан нэгэн үйл явдал тохиов. Тодруулбал, Бишрэлт Металл багийн тамирчин Девон Скотт Хасын Хүлэгүүд багийн А.Азбаярын араас цохиж унагаасан нь гол үйл явдал болжээ.

Дээрх явдал нэгдүгээр үеийн төгсгөлд тохиосон бөгөөд эхний үе дууссаны дараа хоёр тамирчин бие биенээ шатаах үйлдэл хийж, эцэст нь Девон Скотт биеэ барьж дийлсэнгүй. Араасаа, дагз руугаа цохиулсан А.Азбаяр талбайн голд унаж, хэсэг хугацаанд хэвтсэн. Улмаар талбайг чөлөөлөн шууд гэмтлийн эмнэлэг орсон тухай мэдээллийг бид та бүхэнд өчигдөр хүргэсэн.

А.Азбаярын аавтай холбогдож авсан тодруулгыг энд дарж уншина уу.

Дээрх үйл явдлын дараа Бишрэлт Металл багийн зүгээс мэдэгдэл гаргаж, Девон Скоттыг хоёр тоглолт өнжүүлэх шийтгэл оноожээ. Харин лигийн зохион байгуулагчдын зүгээс албан ёсны мэдээлэл гаргаагүй байна. Түүхийг эргэн санавал өнгөрсөн жил мөн Бишрэлт Металлын Силла Эйпсийн Т.Мэндбаярыг талбай дээр авч шидэн хоёр тоглолт өнжих шийтгэл авч байв.

ОЛОН УЛСАД ИЙМЭРХҮҮ ҮЙЛДЛҮҮДИЙГ ХЭРХЭН ШИЙТГЭДЭГ ВЭ? 

FIBA буюу Олон улсын сагсан бөмбөгийн холбооны дүрмээр тоглолтын үеэр өрсөлдөгч багийн тамирчинг зодох, цохих зэрэг хүч хэрэглэсэн бүдүүлэг авир нь "Disqualifying foul" (тэмцээнээс хасах шийтгэлтэй алдаа) гэж тооцогддог.

Үндсэн шийтгэлүүд:

1. Тоглолтоос шууд хөөнө – Зодоон, санаатайгаар цохих зэрэг үйлдэл хийсэн тоглогчийг шүүгч шууд тоглолтоос гаргана.

2. Нэмэлт шийтгэл

   • FIBA-ийн тэмцээн (жишээ нь, Азийн аварга, ДАШТ, олимп) тухайн зөрчилд дүгнэлт гаргаж, нэмэлт шийтгэл оноож болно. Үүнд:

     • Тоглолтын тоогоор эсвэл тодорхой хугацаагаар өнжүүлэх (suspension),

     • Торгууль ногдуулах,

     • Хүнд нөхцөлд бүр тэмцээнээс бүр мөсөн хасах хүртэл шийтгэл авч болно.

Жишээнүүдийг харвал,

Тухайн шийтгэлийг дараах хүчин зүйлс тодорхойлдог:

• Үйлдэл хэр ноцтой байв?
• Санаатай байсан уу?
• Өмнө нь сахилгын зөрчил гаргаж байсан уу?
• Шүүгчид, багийн гишүүдэд хандсан байдал

NBA-тай харьцуулахад FIBA илүү хурдан шийдвэр гаргаж, тоглогчийн сахилга батыг чухалчилдаг.

ТОДХОН ЖИШЭЭ

Азийн сагсан бөмбөгт тохиосон хамгийн сүүлийн том жишээ бол Австрали-Филиппинийн тоглолт байсан билээ. Нийт 13 тоглогч хөөгдсөн тус тоглолтын дараа зодоон хийсэн Филиппинийн арван тоглогч тус бүр 1-6 тоглолт өнжихөөр шийтгүүлж байсан бол Австралийн гурван тоглогч тус бүр 1-5 тоглолт өнжихөөр шийтгүүлж байсан түүхтэй.

ХОРИОТОЙ ЦОХИЛТ

Сагсан бөмбөг байтугай тулааны спорт дээр ч өрсөлдөгчийнхөө дагз руу, толгойн ар хэсэг рүү цохихыг хориглодог билээ. Үүнийг шууд үхэлд хүргэх, тархинд ноцтой гэмтэлд учруулдаг гэж үздэг. Гэвч өчигдөр Девон Скоттын түргэдсэн үйлдэл А.Азбаярын амь насанд заналхийлсэн гэхэд хилсдэхгүй.

Бид бүхэн Пришар Колон гэх америк боксчны намтарыг мэднэ. Дөнгөж 23 настай байсан ирээдүйтэй, залуу америк боксчин тулааныхаа үеэр дагз руугаа цохиулж, улмаар саажилттай болсон билээ. Тулааны үеэр Колон шүүгч болон эмчид хандан толгой эргэж байна гэж хэлсэн ч үргэлжлүүлэн тулалдсан аж. Тулааны дараа түүний толгой эргэж, бөөлжиж, ухаан алдсан гэнэ. Яаралтай эмнэлэгт хүргэхэд тэрбээр цус харвасан байжээ. Мэс заслын дараа Колон 221 хоног комд орсон байв. Колоны гэр бүл тулааныг зохион байгуулагчдаас 900 сая ам.доллар нэхэмжилсэн түүхтэй.