Цахим хуудаст өнөөдөр /2025.04.21/ нэгэн иргэн согтуу эмэгтэй жолоо барьж, зогсоолд байсан олон тооны машиныг мөргөсөн талаар бичлэг нийтэлсэн. Энэ талаар цагдаагийн байгууллагаас тодрууллаа.

Тээврийн цагдаагийн албанаас өгсөн мэдээллээр, цагдаагийн байгууллагад өнөөдөр 16:22 цагт Баянзүрх дүүргийн 40 дүгээр хороо .. дугаар байрны хотхоны замд согтуу жолооч зам тээврийн осол гаргалаа гэх дуудлага мэдээлэл бүртгэгдсэнийг шалгахад 26 настай, эмэгтэй А нь согтууруулах ундааны зүйл хэрэглэсэн үедээ Тоёота Хариер маркийн тээврийн хэрэгслийг жолоодон зогсоолд байсан гурван тээврийн хэрэгслийг мөргөж зам тээврийн осол гаргасан нөхцөл байдал тогтоогдсон.

Жолооч А нь 3.75 хувийн согтолттой мөн жолоодох эрхийн үнэмлэхгүй байсныг тогтоон үргэлжлүүлэн шалгалтын ажиллагааг хийж байна гэлээ.

Иймд согтууруулах ундааны зүйл хэрэглэсэн үедээ тээврийн хэрэгсэл жолоодож өөрийн болон бусдын амь нас, эрүүл мэнд, эд хөрөнгөнд хохирол учруулахаас сэргийлэх, согтууруулах ундааны зүйл хэрэглэсэн болон жолоодох эрхийн үнэмлэхгүй хүнд жолоогоо шилжүүлэхгүй байхыг цагдаагийн байгууллагаас анхааруулж байна.