УИХ дахь Ардчилсан намын бүлэг Хүнс хөдөө аж ахуй хөнгөн үйлдвэрийн сайд Ж.Энхбаярт хариуцлага ярих цаг нь болсон гэж үзжээ. Учир нь, тус бүлэг өнөөдрийн /2025.04.21/ ээлжит хуралдаанаараа ноолууурын салбарын нөхцөл байдлын талаар мэдээлэл авахаар төлөвлөсөн ч сайд Ж.Энхбаяр “Ажил давхацсан тул бүлгийн хуралдаанд оролцож мэдээлэл өгөх боломжгүй” гэдэг шалтаг тоочин оролцоогүй аж. Сайд Ж.Энхбаярын хувьд тус бүлэгт удаа дараа мэдээлэл өгөхгүй, “бултаж” иржээ. Иймд хариуцлага ярихаар шийдсэн байна.

Хүнс хөдөө аж ахуй хөнгөн үйлдвэрийн яамыг Дархан-Уул аймаг руу нүүлгэснээс хойш сайд Ж.Энхбаярын хувьд УИХ-ын чуулганы нэгдсэн хуралдаандаа суух нь ч багассан. Мөн өөрөө “Яам нүүсэн тул 2-3 өдөрт нь Улаанбаатарт ажиллана, бусад үед нь яаман дээрээ буюу Дархан-Уул аймагт ажиллана” гэж мэдэгдсэн удаатай. Явдал суудал ихтэйгээсээ ч болдог уу, Ардчилсан намын бүлгийн хуралд оролцож мэдээлэл өгөөгүй нь ноолуурын үнэ ханш унахтай зэрэгцэн далим ч болж байх шиг. 

Энэ жилийн хувьд ноолуурын үнэ өндөр байсан ч сүүлийн өдрүүдэд эрчимтэй бууж эхэлсэн. Тухайлбал, УИХ-ын Хүнс хөдөө аж ахуйн байнгын хорооны хуралдаанд ноолуурын үнэ ханш, боловсруулалтын талаар тэрбээр мэдээлэл өгсөн.  Дорнод аймагт нэг кг ноолуур 163000-165000, Хэнтий аймагт 155000-158000 төгрөгийн үнэтэй байна. Одоогийн байдлаар улсын хэмжээнд 600 орчим тонн ноолуур худалдан авсан" гэдэг мэдээллийг өгч байв.  Гэвч ноолуурын үнэ зарим аймагт унаснаас 110 мянга болтлоо унаад буй.

Г.ХОРОЛ