Мьянмарт өнгөрсөн сарын 28-нд 7.7 магнитудын хүчтэй газар хөдлөлт болж, чичиргээ нь Хятад, Энэтхэг, Тайландад мэдрэгдсэн билээ. Ялангуяа Тайландын нийслэл Бангкокт баригдаж байсан 30 давхар барилга нурж, олон хүн дарагдсан, нас барсан харамсалтай явдал болсон. Уг барилгад дарагдаж 47 хүн амиа алдсан нь тогтоогджээ.

Тэгвэл Тайландын мөрдөн байцаах албаныхан Бангкок хотод нурсан өндөр барилгыг барьж байсан компанийн гүйцэтгэх захирал хятад иргэнийг баривчилжээ. Тус барилга нь Тайландын томоохон барилгын компани болон Хятадын төрийн өмчит компанийн орон нутгийн охин компанийн хамтарсан хөрөнгө оруулалт аж. Тайландын Хууль зүйн яамны Тусгай мөрдөн байцаах газраас мэдээлснээр тухайн иргэн үйл ажиллагаа эрхлэхийн тулд тайландын иргэдийн нэрийг хууль бусаар ашигласан байжээ.

Мөрдөн байцаагчид мөн компанийн захиралтай холбоотой газруудад нэгжлэг хийсэн байна. Барилгын ажилд ашиглаж байсан зарим бүтээгдэхүүн стандартад нийцээгүй байсан тул уг барилгад ган нийлүүлдэг Хятадын үйлдвэрт мөн нэгжлэг хийжээ.