Энэ сарын 17-19-ны өдөр зам тээврийн ноцтой ослууд гарч долоон иргэн нас баржээ. Тодруулбал, Булган аймгийн Орхон сумын нутаг дэвсгэрт хоёр тээврийн хэрэгсэл мөргөлдөж ослын улмаас 40-44 насны дөрвөн иргэн нас барсан байна. Мөн Төв аймгийн Аргалант сумын нутагт том оврын тээврийн хэрэгсэл суудлын автомашинтай мөргөлдөж, 19-39 насны гурван хүн нас баржээ.

Мөн Баянзүрх дүүргийн нутаг Хонхорын замд том оврын ачааны тээврийн хэрэгслийн жолооч 6 автомашиныг мөргөсний улмаас иргэд гэмтсэн гэх мэдээлэл цагдаагийн байгууллагад бүртгэгдсэн байна.

Налайх дүүргийн нэгдүгээр хорооны нутагт  суудлын тээврийн хэрэгсэл гүйцэт түрүүлэх үйлдэл хийхдээ замын хажуу руу онхолдсон зэрэг зам тээврийн осол тус тус гарчээ. Ослын талаарх шалгалтын ажиллагаа үргэлжилж байгаа аж.

Урин дулааны цаг ирж байгаа энэ үед хөдөө орон нутгийг зорих иргэдийн тоо нэмэгддэг. Тиймээс жолооч нар замын хөдөлгөөний дүрмээ баримталж  хариуцлагатай байхыг Цагдаагийн байгууллагаас анхааруулж байна.