Москвагийн зүүн өмнөд хэсэгт байрлах "Spirit" нэртэй бялдаржуулах төвд хичээллэж байсан залуус дээр гэнэт цагдаагийн алба хаагчид орж иржээ. Хууль бус цагаачид болон цэргийн албанаас зугтагсдыг "агнах" ажиллагааны хүрээнд цагдаа нар ийн орж ирсэн бөгөөд орж ирмэгцээ залуусыг шалан дээр хэвтэхийг тушаасан байна. Мөн залуусыг Оросын иргэн, гадаадын иргэн гэж ангилсныг гэрчүүд мэдээлэв. Дараа нь орос иргэдийг цэрэг татлагын комисст аваачиж, бүртгэлийг нь шалгажээ. Бүртгэлийг хянаж дуусаад зарим эрчүүдийг сулладаг бол заримд нь газар дээр нь цэргийн зарлан хүргэж, саатуулах болжээ.

Харин гадаадын иргэдийг цагаачлалын зөрчилд буруутгаад, нутаг буцах, армид элсэх гэсэн хоёр сонголт өгсөн байна. Цагаачид олноор очдог бялдаржуулах төвүүдийг зориуд олж очдог гэх мэдээлэл ч бий.

"Spirit" бялдаржуулах төвийн зүгээс албан ёсны мэдэгдэл хийгээгүй ч гэлээ ийм явдал тогтмолжсоныг ажилчид нь мэдээлж байна.

Хүний эрхийн ажиглагчдын мэдээлснээр 160 мянган цэрэг татах тухай Путины зарлигаас хойш Оросын хотуудад ийм явдал газар авах болжээ. Тухайлбал, Москва, Санкт-Петербург, Эрхүү, Екатеринбург зэрэг хотод сард хоёр удаа ийм ажиллагаа явагдаж байна.

Үүнээс гадна Кремль шинээр элсэгчдэд их хэмжээний мөнгө санал болгож байна. Германы Олон улсын аюулгүй байдлын судалгааны хүрээлэнгийн судалгааг харвал гуравдугаар сард цэрэгт элсэгчдийн тоо мэдэгдэхүйц нэмэгджээ. Жилийн өмнө өдөрт 600 орчим хүн сайн дураар цэрэгт бүртгүүлдэг байсан бол өдгөө энэ тоо 1000-1500-ийн хооронд хэлбэлзэж байна.

Нэг талаасаа ийнхүү цэрэг татлага идэвхжиж буй нь ОХУ энх тайвныг хүсэхгүй байгаагийн илэрхийлэл гэдгийг Хатан хааны нэгдсэн үйлчилгээний хүрээлэнгийн Оросын мэргэжилтэн Эмили Феррис онцоллоо.