Энэтхэгийн хэвлэл мэдээллийн хэрэгслүүд өглөө бүр зам тээврийн ослын тухай мэдээллүүдээр дүүрсэн байдаг. Өдөр тутмын мэдээллийн эл урсгал чимээгүй хямралыг онцолж байна. Тодруулбал, тус улсад өдөрт дунджаар 474 хүн буюу гурван минут тутамд нэг хүн зам тээврийн ослоор амиа алдаж байна.

Энэтхэгийн зам дээр зөвхөн 2023 онд 172 мянга гаруй хүн амиа алджээ. Тэдний 10 мянга нь хүүхэд байв. Мөн хоёр дугуйтай тээврийн хэрэгсэл ихэнх осолтой холбоотой байна. Аюулгүй байдлын анхан шатны арга хэмжээ аваагүй буюу дуулга өмсөөгүй улмаас 54 мянга, хамгаалах бүс зүүгээгүй улмаас 16 мянган хүн нас баржээ.

Харин 2021 онд гарсан ослуудын 13 хувь нь жолооны үнэмлэхгүй жолоочоос болсон байна.

Засгийн газрын зүгээс янз бүрийн хүчин чармайлт гаргаж, хөрөнгө оруулалт хийдэг ч гэлээ Энэтхэгийн авто замууд дэлхийн хамгийн аюултайд тооцогдсоор байна. Мэргэжилтнүүдийн үзэж байгаагаар асуудлын гол нь зөвхөн дэд бүтэцдээ бус хүмүүсийн зан байдалтай холбоотой. Тодруулбал, дүрэм журмын хэрэгжилт дутмаг, системийг үл тоомсорлодог зэрэг нь зам тээврийн осолд нөлөөлж байна. Мөн замын тэмдэг, тэмдэглэгээний систем гэх мэт жижиг зүйлд анхаарал дутуу хандуулсантай холбоотой.

Гэхдээ эмнэлгийн яаралтай тусламжийг цаг тухайд нь үзүүлсэн бол зам тээврийн ослоор нас барсан хүмүүсийн 50 хувийг аврах боломжтой байсан гэх тайланг албаныхан танилцуулжээ.

Энэтхэг улс нийт 6.6 сая км урт замтай. Өөрөөр хэлбэл, тус улс авто замын сүлжээгээрээ дэлхийд хоёрт буюу АНУ-ын дараа орж байна. Мөн бүртгэлтэй 350 сая тээврийн хэрэгсэл байдаг гэсэн тооцоо бий.