Оросын ерөнхийлөгч Владимир Путин Улаан өндөгний баярыг тохиолдуулан Украинд нэг талын гал зогсоох шийдвэр гаргажээ. Тодруулбал, Москвагийн цагаар Бямба гаригийн (2025.04.19) 18:00 цагаас Ням гаригийг дуустал Оросын бүх хүчин түр хугацаанд гал нээхгүй байх ёстой. Кремлийн өндөр албан тушаалтнуудын уулзалтын үеэр Путин "Хүмүүнлэгийн үүднээс Оросын тал Улаан өндөгний баяраар түр хугацаанд гал зогсоох болно. Гэхдээ аливаа өдөөн хатгалга, гал зогсоох дэглэмийг зөрсөн тохиолдолд шууд хариу арга хэмжээ авахад бэлэн байх ёстой" гэж онцлон тэмдэглэжээ.

Тус улсын Батлан хамгаалах яамны мэдэгдсэнээр, цэргийн тусгай ажиллагаа гэж тодорхойлогдоод буй Украин руу дайрах ажиллагаанд оролцож буй бүх цэргүүд гал зогсоох нэг талын өдрийг сахин биелүүлэх үүрэг авсан гэдгийг баталж байна. Гэсэн хэдий ч уг мэдэгдэл гарснаас нэг цагийн дараа Укрианы ерөнхийлөгч Володимир Зеленский "Telegram" хуудаснаа нэг өдрийн гал зогсоох болсныг үл харгалзан Оросын дронууд нутаг дэвсгэр дээгүүр нь нисч байна гэж мэдэгдэв. Тухайлбал, Зеленский мэдэгдэлдээ "Путины хүмүүсийн амь насаар тоглох гэсэн дараагийн оролдлого нь яг одоо Украин даяар агаарын түгшүүрийн дохиолол тархаж буйгаар харуулж байна. 17:15 цагт Оросын нисгэгчгүй онгоцнууд манай тэнгэрт харагдсан. Тэнгэрт байх эдгээр шахид нь дорно дахины ард түмнийг гэх Путины хандлага!" гэж тэмдэглэсэн байв.

Үүнээс гадна, Бямба гаригт Орос болон Украины тал хоригдол солилцсон байна. Украины талаас 246 цэргээ Оросын талаас хүлээн авчээ. Мөн Орос 31 шархадсан украин цэрэг, Украин 15 шархадсан орос цэргийг суллаж, солилцсон байна.