Хамгийн сүүлийн үеийн технологи, спортын тэсвэр тэвчээрийг хослуулан хүн дүрст роботууд хагас марафонд өрсөлдөж, дэлхийн түүхэнд дурсагдах үйл явдал болов. Тодруулбал, Бямба гаригт /2025.04.19/ Бээжингийн Эдийн засаг, технологийн хөгжлийн бүсэд болсон марафонд 20 робот, мянга гаруй хүн 21.0975 км замд хүч сорин уралдсан байна.

Тэргүүн байранд "Tiangong Ultra" нэртэй робот орсон бөгөөд энэ нь хоёр цаг, 40 минут, 42 секундэд марафоны замыг туулжээ.

"Tiangong Ultra" нь спортын тэсвэр хатуужилтай байхаар бүтээгдсэн робот юм. Энэ нь 12 км/цагийн дээд хурдтай гүйх чадвартай бол дундаж хурд нь 7.88 км/цаг юм. Зохион бүтээгчдийн мэдээлснээр, "Tiangong Ultra" робот нь 1.8 метрийн өндөртэй бөгөөд гүйхэд нь улам хүн шиг харагдуулахын тулд алхалт хоорондын зайг томсгож, үеэрээ хөдөлдөг байна. Харин удаах байранд “Noetix Robotics” компанийн бүтээсэн робот гурван цаг, 27 минут, 50 секундийн амжилтайгаар шалгарчээ. Тэмцээний үеэр хариуцагч багийнхан робот тамирчнаа нэг удаа сольсон юм.