Цагаан ордон Хятадын судалгааны лабораториос вирус алдагдсанаар Covid-19 дэгдсэн гэсэн онол бүхий шинэ цахим хуудас бүтээжээ. Уг хуудасны нэр нь “Лабораториос алдагдсан нь: Covid-19-ийн жинхэнэ гарал үүсэл" бөгөөд ерөнхийлөгч Дональд Трампийн зурагтай. Баасан гаригт олон нийтэд уг хуудсыг танилцуулжээ.

Тус хуудсанд “Covid-19-ийн вирус нь байгальд байдаггүй биологийн шинж чанартай. Хятадын Ухань хотын нэгэн лабораторид биологийн аюулгүй байдлын хангалтгүй түвшинд судалгаа хийж байсан түүхтэй. Лабораторийн осол Covid-19-ийн эх үүсвэр болсон байх магадлалтай. Амны хаалт тус вирусээс үр дүнтэй хамгаалдаг гэсэн баттай нотолгоо байгаагүй” гэжээ.

Мөн тус цахим хуудас Ухань хотын хиймэл дагуулын зургийг харуулжээ.

Цагаан ордон коронавирусын тахлын эсрэг Төлөөлөгчдийн танхимын сонгогдсон дэд хорооны тайлангаас мэдээллээ авсан гэж үзэж байна. Тус хороог Бүгд найрамдах намынхан удирддаг болохыг АНУ-ын хэвлэлүүд онцолжээ. Covid-19-ийн эх үүсвэрийн талаар тагнуулын байгууллагууд болон шинжээчид хоёр хуваагдсан гэж үзэж байна.