Японы төв хэсэгт Баасан гаригийн орой 20:19 цагийн орчимд 5.1 магнитудын хүчтэй газар хөдөлжээ. Газар хөдлөлтийн улмаас цунамийн аюул нүүрлээгүй. Японы цаг уурын агентлагийн мэдээлснээр газар хөдлөлтийн голомт Нагано мужийн хойд хэсэгт 13 км гүнд байжээ.

Японы засгийн газар энэ сарын эхээр болзошгүй газар хөдлөлтөөс урьдчилан сэргийлэх сэрэмжлүүлгийг гаргасан билээ. Тодруулбал, ирэх 30 жилийн дотор Номхон далайн эргийн Нанкай хотгорт есөн магнитудын хүчтэй чичирхийлэл болох магадлал 80 хувьтай гэж мэргэжилтнүүд үзэж буй. Учир нь тус бүс нь 100-200 жилд нэг удаа хөдлөх тектоник хавтангийн зааг дээр үүссэн далайн гүн суваг юм. Энэ оны эхээр Мияазаки мужийн ойролцоо 6.6 магнитудын хүчтэй газар хөдөлсөн нь илүү хүчтэй газар хөдлөлт удахгүй болж магадгүй гэх айдсыг нэмэгдүүлсэн.

Япон улс нь Номхон далайн галт цагираг гэгддэг газар хөдлөлтийн идэвхтэй бүсэд оршдог тул үхлийн аюултай газар хөдлөлтөд өртөмхий байдаг. Тухайлбал, олон тооны тектоник хавтангийн нэгдэл дээр оршин тогтнодог тул дэлхийн томоохон газар хөдлөлтийн 81 орчим хувь нь Японд тохиолдож байжээ.