Пакистан дахь "KFC"-ын сүлжээ ресторанууд сүүлийн долоо хоногт 10 гаруй удаа халдлагад өртжээ. Эдгээр хэрэгтэй холбоотойгоор цагдаа нар дор хаяж 178 хүнийг баривчлаад байна. Гэмт этгээдүүд АНУ-ын эсрэг үзэл болон Израилийн Газын зурваст хийж буй дайныг эсэргүүцэж ийм халдлага үйлдсэн аж. Халдлагын улмаас Лахор дахь салбарын нэг ажилтан буудуулж, амиа алдсан байна.

Цагдаа нар аюулгүй байдлыг хангах үүднээс сүлжээ рестораны 27 салбарын хамгаалалтыг чангатгаад байна.

Баривчлагдсан хүмүүсийн дунд Исламын шашны Техрик-е-Лаббайк Пакистан холбооны гишүүн байгаа аж. Гэхдээ тус холбоо халдлага зохион байгуулаагүй гэдгийг хэвлэлийн төлөөлөгч нь хэлжээ. Хэвлэлийн төлөөлөгч Рехан Мохсин Хан "Бид Израилийн бүтээгдэхүүнийг бойкотлохыг уриалсан боловч сүлжээ ресторанд үймээн үүсгэх уриалга гаргаагүй. Хэрвээ өөрийгөө манай идэвхтэн гэж нэрлэсэн хэн нэгэн ийм үйлдэл хийсэн бол энэ нь холбооны бодлоготой ямар ч холбоогүй" гэжээ.

"KFC" түргэн хоолны ресторан нь Пакистан дахь АНУ-ын бэлгэ тэмдэг гэж тооцогдох нь бий. Сүүлийн хэдэн 10 жилийн хугацаанд дээрхтэй ижил төстэй халдлага, жагсаал олон удаа гарсан. Үндсэндээ Америкийн эсэргүүцсэн үзэл санааны хүндийг тус ресторан үүрсээр иржээ.

Сүүлийн саруудад Израилийн Газын зурвас дахь дайнаас болж Пакистан болон бусад исламын шашинтай оронд барууны брэндүүдийг бойкотлох, бусад хэлбэрээр жагсах нь ихэссэн байна.