Украин Пүрэв гаригт АНУ-тай ашигт малтмалтын гэрээний санамж бичигт гарын үсэг зуржээ. Гэхдээ гэрээний нарийн нөхцлийг мэдээлээгүй байна. Энэхүү санамж бичиг нь хоёр улс Украины байгалийн баялгийг хамтран ашиглах тухай хэлэлцээрийн үндэс болох юм.

Украины Эдийн засгийн хөгжил, худалдааны сайд Юлия Свириденко "Америкийн түншүүдтэйгээ Эдийн засгийн түншлэлийн хэлэлцээр болон Украины сэргээн босголтын хөрөнгө оруулалтын сан байгуулах замыг нээж өгөх санамж бичигт гарын үсэг зурсандаа баяртай байна. Хийх зүйл их байгаа ч одоогийн ахиц дэвшилийг харвал энэ баримт бичиг хоёр улсад маш их ашиг тустай байх болов уу" гэв.

Гэрээнд АНУ-ын талаас Сангийн сайд Скотт Бессент гарын үсэг зуржээ. Трамп, Бессент нар ирэх долоо хоногт иж бүрэн хэлэлцээрт гарын үсэг зурах аж. Дөрөвдүгээр сарын 24-нд зурна гэж төлөвлөж байгааг Трамп Пүрэв гаригт хэлжээ.

Бессентээс дэлгэрэнгүй мэдээлэл авахыг хүсэхэд "Энэ бол бидний өмнө нь Украинтай тохирч байсан зүйл. Бид шууд том хэлэлцээрт орсон. 80 хуудастай гэрээ байгаа. Бид үүнд гарын үсэг зурах болно" гэв.

Эргэн сануулахад, Трамп бүрэн эрхийн хугацаагаа эхлүүлмэгцээ Украинтай ашигт малтмалын гэрээ байгуулахыг хүсч, Украины газрын ховор элемент, чухал ашигт малтмал, газрын тос, байгалийн хий болон бусад байгалийн нөөцийн ордуудыг хамтран ашиглах санал тавьсан. Үүнийг гурван жил үргэлжилсэн дайны туршид үзүүлсэн тусламжийн нөхөн төлбөр гэж үзэж байгаа юм.