Нийслэлийн иргэдийг эрүүл, аюулгүй орчинд амьдрах нөхцөлийг бүрдүүлэх зорилгоор эзэнгүй нохой, муур, мал амьтныг барьж, асрамжлах газарт байрлуулах талаар Улаанбаатар хотын Захирагчийн ажлын албанаас мэдээллээ. Тус ажлыг өнөөдрөөс /2025.04.21/ эхлүүлээд байна. Энэ талаар холбогдох хүмүүсээс тодрууллаа.

Улаанбаатар хотын Ерөнхий менежер  Г.БАТЗОРИГ:

-Нийслэлийн Засаг даргын захирамжаар Улаанбаатар хот орчмын зуслангийн бүс болон Богдхан ууланд зэрлэгшсэн нохой, муур барих ажлыг нэгдсэн хэмжээнд зохион байгуулна.  Урьдчилсан судалгаагаар дээрх байршлуудад 1000 орчим эзэнгүй мал, нохой, муур байна гэж тооцоолсон.

Өнөөдрөөс эхлэн ирэх Баасан гариг буюу дөрөвдүгээр сарын 25 хүртэл дүүрэг, хороод, онцгой байдал болон цагдаагийн 1270 орчим албан хаагчтай хамтарч, бүсчилсэн байдлаар ажиллана.

Мөн эдгээр албан хаагчдыг сургах, урьдчилан сэргийлэх вакцинжуулалтад хамруулах, тусгай багаж хэрэгслээр хангах зэрэг ажлыг зохион байгуулна.

УБЗАА-ны Орчны бохирдол, хог хаягдал, удирдлагын хэлтсийн дарга Б.МӨНХ-ЭРДЭНЭ:

-Урин дулаан цаг ирж буйтай холбоотойгоор зуслангийн бүс, ногоон бүсэд амрагч иргэдээс ирсэн гомдлын дагуу дээрх ажлыг зохион байгуулахаар төлөвлөсөн. Тус ажлын хүрээнд зэрлэгшсэн нохой, муурыг түр байрлуулах асрамжийн газрыг ашиглалтад оруулсан. Иргэдийн аюулгүй амьдрах орчин, нөхцөлийг бүрдүүлэхийн тулд уг зориулалтын байр нь зайлшгүй байх шаардлагатай.

Тиймээс иргэд энэ сарын 21-25-ны өдрүүдэд нохойгоо уях, ногоон бүсэд амарч, зугаалахаас түр зайлсхийхийг уриалж байна.

ДҮҮРГҮҮД МУУР, НОХОЙ УСТГАХАД 400-650 САЯ ТӨГРӨГИЙН ТЕНДЕР ЗАРЛАЖЭЭ

Сонгинохайрхан, Баянзүрх, Баянгол дүүргийн худалдан авах ажиллагааны албанаас эзэнгүй нохой, муурын тоо толгойг бууруулах 250-650 сая төгрөгийн өртөг бүхий тендер зарлажээ.