Дани улс дайны туршлага судлахын тулд Украин руу цэргүүдээ илгээхээр төлөвлөж байна. Тус улсын ерөнхий командлагч, хошууч генерал Питер Бойсен хэлэхдээ "Данийн зэвсэггүй цэргүүдийг нисгэгчгүй онгоцоор байлдаж сургахаар илгээнэ. Цэргүүд фронтын шугамаас алслагдмал боловч Оросын алсын тусгалын пуужингийн довтолгоонд өртсөөр байгаа баруун Украинд байрлана. Украинчуудын хуримтлуулсан туршлагыг судлахын тулд бид зарим багаа илгээж байна. Тэд дайнд оролцохоор явахгүй. Операторууд болон багш нар 1-2 долоо хоногийн хугацаатай сургалтад хамрагдана. Сургалтыг аль болох хурдан, магадгүй энэ зун эхлүүлнэ. Хэдэн цэрэг илгээхээ хараахан шийдээгүй байна" гэжээ.

Харин ОХУ энэ үйлдлийг буруушааж байна. Энэ нь Данийг хууль ёсны цэргийн бай болгоно гэдгийг энэ хүрээнд анхааруулав.

Тодруулбал, Дани дахь Оросын Элчин сайд Владимир Барбин "Энэ бол өдөөн хатгалга. Дани улс Украин дахь мөргөлдөөнийг улам гүнзгийрүүлэх болно. Украины нутаг дэвсгэрийн гүнд болон фронтын шугамд байрлах штабууд, сургалт, боловсролын төвүүд, түүнчлэн цэргийн албан хаагчид, цэргийн техник хэрэгслийн байршил зэрэг нь хууль ёсны бай мөн" гэв.

Энэ төсөл Украины ерөнхий командлагч Александр Сирськийн урилгаар эхэлсэн аж.

Түүхэн дэх бусад мөргөлдөөнүүдээс илүүтэйгээр Украинд нисгэгчгүй онгоцыг өргөнөөр ашигласан. Украинд хийсэн халдлагын 70 гаруй хувийг довтолгооны дрон эзэлж байна. Украины тал өөрсдөө ч бас ихэнх халдлагаа дроноор үйлдэж байна.