Хөвсгөл аймгийн “Шинэ мөрөн” худалдааны төвддөрөвдүгээр сарын 14-ний орой гал гарсан. Гал түймрийн тархалтыг онцгойгийнхон таван цаг ажиллаж унтраасан бөгөөд галын лумаас 260 гаруй иргэн хохироод байгаа юм.

Тус худалдааны төв нь 100 хувь орон нутгийн өмчийнх байсан бөгөөд төвийн суурин дээр төр хувийн хэвшлийн түншлэлээр дахин худалдааны төв барьж, ирэх аравдугаар сард ашиглалтад оруулна гэдгийг Хөвсгөл аймгийн Засаг даргын тамгын газраас мэдээллээ.

ОБЕГ-аас өгсөн мэдээллээр, худалдааны төвд гарсан галыг унтраахаар тус аймгийн онцгой байдлын газрын 76 албан хаагч ажилласан. Галын дуудлага дөрөвдүгээр сарын 14-ний  орой 21:34 цагт ирсэн. 2017 онд ашиглалтад орсон, 73х43 хэмжээтэй, төмөр карказан, сэндвичин барилга байсан. Галын тархалтыг тухайн өдрийн 00:35 цагт зогсоож, 04:00 цагт бүрэн унтраасан. Галын байцаагч, цагдаагийн байгууллагын ажилчид ажиллаад, шалтгаан нөхцөлийг тогтооно гэсэн юм.

Хөвсгөл аймгийн Засаг дарга Л.Төмөрбаатарын хэвлэлд өгсөн мэдээллээр, 2024 оны дөрөвдүгээр сарын 14-ны 21:34 минутын орчимд гал хоёр давхраасаа гарсан. Онцгой байдлын албан хаагчид дуудлага очсон даруй очсон. Онцгой байдлын албан хаагчид болоод орон нутгийнхан галын унтраахаар бүхий л хүчин чадлаараа ажилласан. Гэвч сэндвичин барилга учир зогсоох боломжгүй юм байна.

260 түрээслэгчтэй, 100 хувь орон нутгийн өмчийн барилга. Одоогоор найман лангууны барааг гаргаж авсан гэсэн мэдээлэлтэй байна. Хоёр давхар барилгын хоёр дахь давхар нь бүрэн шатсан. Нэг давхар руу гал тархсан.

Манай аймаг хүн ам олонтой. Онцгой байдлын албан хаагчдын техник төхөөрөмж, хүн хүч учир дутагдалтай байна гэсэн дүгнэлттэй байгаа. Гэхдээ манай Онцгой байдлын газар хуульд заасан үүргийнхээ дагуу сайн ажилласан. Засаг даргын тамгын газар, Ус суваг нийтийн аж ахуйн газар, Онцгой байдлын газар өөрсдийн хэмжээнд шаардлагатай арга хэмжээг авч ажиллалаа. Галын дүгнэлт гарна.  Гэм буруутай этгээд тодорхой болно. Хариуцлагын асуудал яригдана. Хохирлын журмын дагуу төлж таарна хэмээн мэдэлсэн.