Дайнд олзлогдогсдыг хэвлэл мэдээллийн камерын өмнө гаргах нь олон улсын хүмүүнлэгийн хуулийг зөрчсөн хэрэг юм. Гэвч Украин энэ долоо хоногт олзны хятад цэргүүдийг хэвлэлийн бага хуралд оролцуулав. Олон улсын Улаан загалмайн хороо энэ талаар тайлбар өгөхдөө "Тэднийг олон нийтийн сониучирхал, доромжлолоос хамгаална гэхээсээ илүүтэй үг хэлэх боломж олгох нь үнэ цэнтэй байсан" гэжээ.

Хятад улс Украин дахь дайнд төвийг сахисан байр суурь илэрхийлсээр ирсэн бөгөөд иргэдээ гадаадын мөргөлдөөнд оролцохгүй байхыг уриалдаг. Гэтэл Украин дахь хятад цэргийн тоо олзны хоёроос хамаагүй олон байгаа гэдэг мэдээлэл тарсан нь анхаарал татаад буй.

Олзны цэргүүд хэлэхдээ Украинд ирэх гол шалтгаан нь цалин урамшуулал байсан гэжээ. Тэдний нэг нь цар тахлын үеэр ажилгүй болсон байжээ. ОХУ тэдэнд 3000 орчим ам.долларын цалин амласан нь тэдний олдог хэдээс хоёр дахин их байсан аж. Эмнэлгийн нөхөн сэргээх чиглэлээр ажиллаж байсан туршлагатай хүний ​​хувьд тэрбээр Оросын армид энэ чиглэлээрээ ажиллахыг хүссэн. Гэсэн ч Москвад ирмэгц нь түүнийг байлдааны бэлтгэлд хамруулжээ. Баримт бичгүүд нь зөвхөн орос хэл дээр байсан бөгөөд ихэвчлэн дохио зангаагаар л ойлголцож байв.

Украины тагнуулын албаны эх сурвалжийн дэлгэсэн гэрээг харвал "Сайн дурын ажилтан жилийн хугацаанд байлдааны ажиллагаанд оролцох, дайчилгааны үеийн үүрэг биелүүлэх, онц байдал, дайны үеийн байдал, олон улсын энх тайван, аюулгүй байдлыг сахин хамгаалах, сэргээх үйл ажиллагаанд оролцох, ОХУ-ын нутаг дэвсгэрээс гадуурх олон улсын террорист үйл ажиллагааг зогсоох үүрэг хүлээнэ" гэсэн утгатай байжээ.

Тэдний тулааны талбарт авчирмагцаа мөн л ойлгохгүй орос хэлээр нь зааварчилгаа өгсөн байна.

Хятад цэргүүд Украинд ирсэн нь Бээжингийн албан ёсны бодлоготой холбоотой гэж бодож байгаа эсэхийг нь Зеленскийгээс асуухад "Үүнд өгөх хариулт одоогоор алга. Украины аюулгүй байдлын алба үүн дээр ажиллаж байна. Хэн нэгэн тушаал өгсөн гэж бид хэлсэнгүй, тийм мэдээлэл бол алга" гэв. Мөн "Бээжин энэ талаар мэдэж байгаа. Оросууд Хятадын олон нийтийн сүлжээгээр дамжуулан ажилд авах тухай сурталчилгааны бичлэг түгээдэг" гэсэн юм.

Цэргүүд ч үнэхээр ТикТокийн бичлэгээс ажлын зар харснаа хэлжээ. Бичлэгийг анхандаа оросуудад зориулж хийсэн боловч сүүлд нь хятад хэлээр хадмал орчуулга нэмсэн. Хадмал орчуулгыг аль нэг албан ёсны байгууллага, аль эсвэл хувь иргэн хийсэн эсэх нь тодорхойгүй. Ийм бичлэг Хятадын цахим сүлжээнд тараад жил гаруй болж байгаа аж.

Орос, Украины хэн хэнийх нь талд гадаадын дайчид байлдсаар ирсэн. 2024 оны сүүлчээр танилцуулсан "CNN"-ийн жагсаалтыг харвал Оросын талд байлдаж байсан Шри Ланкийн зургаа, Балбын долоо, Сомали, Конго, Сьерра-Леон, Египет, Сири, түүнчлэн хуучин ЗХУ-ын бүгд найрамдах улсуудын 10 орчим иргэн Украины армид олзлогджээ. Энэ оны нэгдүгээр сард хоёр хойд солонгос иргэн олзлогдсон нь Пёньянаас илгээсэн 14 мянга орчим цэргийн нэг хэсэг байв.

ОХУ-д өдгөө гадаадын дайчид хамгийн их хэрэгтэй байна. Энэ талаар Украины Батлан ​​хамгаалахын тагнуулын албаны эх сурвалж хэлэхдээ "Ийм урт фронтын шугамыг зөвхөн өөрийн цэргүүдээр хамгаалах болможгүй. Тэд боломжтой бүхнийг элсүүлэхээр эрмэлзэж байна" гэв.

Украин өмнө нь Балба, Африкийн цэргүүдийг оролцуулсан хэвлэлийн бага хурал зохиож байсан удаатай. Гэсэн ч энэ удаад хятад цэргүүдийг оролцуулсан нь ер бусын. Нарийн хэлбэл, цаг хугацаа нь нэн чухал юм.

Энэ үйлдлээрээ Зеленский АНУ-д мессеж илгээсэн байх магадлалтай. Украинд өдгөө АНУ-ын анхаарлыг татах, дэмжлэгийг нь авах хэрэгцээ хамгийн их байна. Яагаад гэвэл дайныг зогсоох яриа хэлэлцээ төдийлөн үр дүн муутай, сунжирсан байдалтай хэвээр байна. АНУ яг одоо Украинд бус Хятадад хамгийн их анхаарал хандуулж буй. Тиймээс Зеленскийн байр сууринаас бодоод үзвэл, Хятад улс мөнгө, улс төрийн дэмжлэгээс илүү тусламжийг Орост үзүүлж байна гэдгийг дэлхий нийтэд харуулах нь чухал байж мэдэх юм.