ОХУ-ын ерөнхийлөгч Путин, Катарын эмир шейх Тамим бин Хамад Аль-Тани нар өнөөдөр Москва хотноо Украин дахь дайныг зогсоох боломжит хэлэлцээрийн талаар хэлэлцэнэ. Үүнээс гадна тэд гадаад худалдаа, олон улсын өдөрлөгийн хэд хэдэн асуудлыг голчлон хэлэлцэнэ гэж Кремль мэдэгдэв. Кремлийн хэвлэлийн төлөөлөгч Дмитрий Песков энэ талаар хэлэхдээ "Тэд Украины асуудлаар санал бодлоо солилцох нь гарцаагүй. Бүс нутгийн асуудлыг ч бас орхигдуулахгүй. Бүс нутаг мөргөлдөөн ихтэй. Янз бүрийн нөхцөл байдлыг шийдвэрлэхэд Катарын гүйцэтгэх үүрэг маш том" гэсэн юм.

Харин Катарын Гадаад хэргийн сайд Мохаммед Аль-Хулайфи "Удирдагчид Украин, Сири, Газын зурвас болон шингэрүүлсэн байгалийн хийн асуудлыг хэлэлцэнэ. Орос, Украины дайнаас болж эрчим хүч, үндсэн бараа бүтээгдэхүүний үнэ өссөн. Энэ нь дэлхийн нийлүүлэлтийн сүлжээг хямралд хөтлөөд буй. Яриа хэлэлцээ эрчим хүчний зах зээлийг тогтворжуулахад туслах болно" гэжээ.

Путин, Катарын эмир шейх Тамим бин Хамад Аль-Тани нар хамгийн сүүлд өнгөрсөн оны долдугаар сард Шанхайн хамтын ажиллагааны байгууллагын дээд хэмжээний уулзалтын үеэр Астанад уулзжээ.

Катар нь Орос, Украины хооронд зуучлагчийн үүрэг гүйцэтгэхээс гадна дайнаас болж эцэг эхээсээ хагацсан хүүхдүүдийг эх оронд нь эргүүлэн авчрах ажлыг зохицуулахаар хэд хэдэн удаа оролдсон. Цаашилбал, АНУ, Ираны хооронд ч бас зуучлагчаар ажиллаж буй.