Цагдаагийн албаны машиныг хувийн хэрэгцээнд ашиглаж, эхнэр, хүүхдээ зөөж байна гэх зураг, мэдээлэл цахим хуудаст нэгэн иргэн нийтэлсэн. Тус мэдээлэл нь худал гэдгийг албаныхан хэлсэн ч иргэд үгүйсгэж байгаа юм.

Тээврийн цагдаагийн албанаас өгсөн мэдээллээр, цахим хуудаст нийтлэгдсэн мэдээллийг тодруулбал 2025 оны дөрөвдүгээр сарын 15-ны өдрийн 18:27 цагт Чингэлтэй дүүргийн Замын цагдаагийн хэлтсийн зохицуулагч цагдаагийн дэслэгч С нь албан үүргээ гүйцэтгэж яваад Чингэлтэй дүүргийн тавдугаар хороо Гэсэр сүмийн баруун замд төөрөөд уйлсан байдалтай 5-6 насны эмэгтэй хүүхэд замын хажууд зогсож байсныг олж, ээжийнх нь утсыг тодруулан, шуурхай арга хэмжээ аван ээжтэй нь холбогдож хүлээлгэн өгсөн.

Олон нийтийн сүлжээнд бичсэн иргэний мэдээлэл нь худал бөгөөд алба хаагчид хувийн хэрэгцээнд албаны машиныг ашигладаггүй гэв.

Мөн тус мэдээлэлтэй холбоотойгоор алга болсон гэх охины ээж, алга болсон охиныг минь дөрөвдүгээр сарын 15-ны үдээс хойш Чингэлтэй дүүргийн цагдаагийн алба хаагч олж, хүлээлгэж өгсөн. Зураг дээрх үйл явц охиноо хүлээж авч байгаа үеийн зураг гэжээ.