УИХ-ын 2025 оны хаврын ээлжит чуулганы хуралдаанаар хэлэлцэх асуудлын тов, дарааллын дагуу өнөөдөр /2025.04.16/ Лхагва гаригт Эдийн засгийн байнгын хороо, Төсвийн байнгын хороо, Аж үйлдвэржилтийн бодлогын байнгын хороо, Аюулгүй байдал, гадаад бодлогын байнгын хороо хуралдаж байна.

Эдийн засгийн байнгын хорооны хуралдаанаар Монгол Улс болон Евразийн эдийн засгийн холбоо, түүний гишүүн орнууд хооронд байгуулах худалдааны түр хэлэлцээрийн төслийг хэлэлцэх ёстой байсан ч судалгаа дутуу гэх үндэслэлээр хэлэлцэхээс татгалзжээ.

Энэ талаар тус Байнгын хорооны гишүүн Б.Мөнхсоёл "Энэ хэлэлцээр бол үйлдвэрлэгчдийн анхаарлыг татсан чухал асуудал. Эдийн засгийн байнгын хороо үүнийг хэлэлцэх байсан боловч хойшлууллаа. Яагаад вэ гэхээр, олон нийтийн хэлэлцүүлгийг маш сайн хийх ёстой. Гэтэл энэ ажил дутуу хийгдсэн гэж үзэж байгаа. УИХ-ын гишүүдэд Хүнсчдийн холбооноос албан бичиг ирсэн. Судалгааны үр дүнгүүд хоорондоо зөрчилтэй гарсан. Хүнсчдийн холбоо МУИС-ийн эдийн засгийн шинжилгээ хийдэг хүрээлэнд захиалга өгч судалгаа хийлгэсэн юм байна лээ. Судалгаагаар энэ хэлэлцээрийн үр ашиг нь тааруу байна гэж дүгнэсэн юм байна. Харин Эдийн засаг, хөгжлийн яамны хийсэн судалгаагаар бол хэлэлцээр хийх нь зүйтэй гэж үзсэн" гэх тайлбарыг өгсөн юм.

Харин Төсвийн байнгын хорооны хуралдааныг хаалттай явуулах саналыг байнгын хорооны дарга Ц.Даваасүрэн гаргасан ч гишүүдийн олонх дэмжсэнгүй. Улмаар Монгол Улс болон Евразийн эдийн засгийн холбоо, түүний гишүүн орнууд хооронд байгуулах худалдааны түр хэлэлцээрийн төслийг хэлэлцэхийг хойшлуулах саналыг Эрчим хүчний сайд Б.Чойжилсүрэн гаргаж гишүүдийн 52.6 хувь нь дэмжсэнээр төслийг хэлэлцэх асуудлыг түр хойшлуулан шийдвэрлэлээ. 

Энэ талаар ХХААХҮЯ-ны сайд Ж.Энхбаяр "Евроазийн эдийн засгийн холбоотой түр хэлэлцээр байгуулснаар дотооддоо үйлдвэрлэж байгаа 20-иод нэр төрлийн бараанаас бусад бүтээгдэхүүний үнэ хямдарч, нийлүүлэлт сайжирна" гэдгийг онцолж байгаа юм.