Хятадын бараа бүтээгдэхүүнд 145 хувийн тариф ногдуулах АНУ-ын шийдвэрийн хариуд Бээжин агаарын тээврийн компаниуддаа "Боинг" онгоцыг цаашид худалдаж авахгүй байхыг тушаалаа. Түүнчлэн АНУ-ын компаниудаас нисэх онгоцтой холбоотой тоног төхөөрөмж, эд анги худалдан авахаа зогсоохыг хүссэн байна. "Боинг" компани Хятадыг хамгийн өсөлттэй зах зээл гэж үздэг боловч энэ мэдэгдлийн дараа компанийн хувьцаа 0.5 хувиар буурчээ.

Ийнхүү агаарын тээврийн салбар ч Америк, Хятадын худалдааны дайнд татагдан оров.

Зарим агаарын тээврийн компани тарифын шийдвэрийн дараа онгоц худалдан авалтаа хойшлуулна гэж мэдэгдсэн. Тодруулбал, Хятадын шилдэг гурван агаарын тээврийн компани "Air China", "China Eastern Airlines", "China Southern Airlines" 2025-2027 оны хооронд тус бүр 45, 53, 81 "Боинг" онгоц хүлээн авахаар төлөвлөсөн байжээ.

Хятадын нийлүүлэлтийн богино хугацаанд зогсоох нь "Боинг" компанид төдийлөн их нөлөө үзүүлэхгүй гэж шинжээчид үзэж байна. Нэгдүгээрт, "Боинг" компани энэ хугацаанд нийлүүлэлтээ бусад агаарын тээврийн компани руу чиглүүлэх боломжтой. Хоёрдугаарт, Хятадын зах зээлд давуу байр суурь эзэлдэг өөр нэгэн үйлдвэрлэгч болох "Airbus" дангаараа нийлүүлэлтийг хангах боломжгүй. Гуравдугаарт, шинэ эд ангиудын импортыг хориглох нь Хятадын "C919" зэрэг одоо байгаа нисэх онгоцны флотод хүндрэл учруулах юм. АНУ-аас онгоцны эд анги худалдаж авахаа зогсоовол энэ хөтөлбөр бараг бүрэн үгүй болно гэдгийг "Bank of America"-ийн шинжээч Рон Эпштейн хэлжээ.

"Боинг"-ийн нийлүүлэлт Хятадад тасалдаж байсан тохиолдол нэгээр тогтохгүй. Тухайлбал, "Боинг" компанийн "737 MAX" онгоц 2018, 2019 онд хоёр удаа осолдож, 350 орчим хүн амиа алдсаны дараа Хятад улс анх удаа нийлүүлэлтийг зогсоож байв.