Хятадын дуунаас ч хурдан пуужингууд 20-хон минутад л АНУ-ын нисэх онгоц тээгч хөлгийн флотыг тэр чигээр нь устгах чадвартайг Пентагоны тэргүүн Пит Хегсэт анхаарууллаа. Тэрбээр "АНУ-ын хүчийг харуулж буй зүйл нь өнөөг хүртэл нисэх онгоц тээгч хөлгийн флот байсан. Гэхдээ Хятадын дуунаас хурдан 15 пуужин байхад 20 минутад манай 10 тээгч хөлгийг устгаж чадна. АНУ дайны тоглоом болгонд Хятадад ялагдаж байна. Хятад улс АНУ-ыг устгахад зориулж л армиа онцгойлон хөгжүүлж байна" гэсэн юм.

Тэдний энэ ялгаатай байдал нь АНУ-ын хүнд суртал болон зэвсгийн худалдан авалт удаашралтай байдагтай холбоотой гэж тэр буруутгав.

АНУ-ын Батлан хамгаалах яамны 2024 оны арванхоёрдугаар сард гаргасан тайланд дурдсанаар Хятад улс сүүлийн 20 жилийн хугацаанд дуунаас хурдан пуужингийн технологио идэвхтэй хөгжүүлжээ. Тэр бүү хэл дуунаас хурдан пуужингийн арсеналаараа дэлхийд тэргүүлж байгаа аж.

Панамын суваг дахь Хятадын эрсдэлийг ч бас Хегсэт онцоллоо. Энэ нь Карибын тэнгисийг Номхон далайтай холбож буй 82 км хиймэл усан зам юм. АНУ-ын чингэлэг тээврийн 40 орчим хувь нь жил бүр энэ чиглэлд тулгуурладаг. Өөрөөр хэлбэл, АНУ тус сувгийн хамгийн том хэрэглэгч. 2021 онд Панамын сувгаар дамжин өнгөрсөн нийт хөлөг онгоцнуудын 73 хувь нь АНУ-ын боомтуудаас хөдөлсөн эсвэл зорьсон чиглэлд явжээ.

Хятад улс 2017 оноос хойш бүс нутаг дахь оролцоогоо өргөжүүлж, сувгийн ойр орчимд дэд бүтцийн хөрөнгө оруулалт хийх болсон. Хонгконгт төвтэй "Hutchison Ports PPC" компаниар дамжуулан сувгийн хоёр захын боомтуудад хяналт тавих зэрэг нь Хятадын ажил болоод буй. Тиймээс Хятадыг Панамын сувагт байнгын аюул заналхийлэл гэж Хегсэт тодорхойлжээ.

АНУ, Панамын аюулгүй байдлын албан тушаалтнууд энэ сарын эхээр хамтарсан гэрээ байгуулсан. Уг гэрээнд Панамын хянадаг төрөл бүрийн байгууламжуудад АНУ цэрэг байршуулах тухай тусгажээ. Энэ гэрээгээр дамжуулан Трампийн засаг захиргаа АНУ-ын стратегийн усан замыг эргүүлэн авах төлөвлөгөөтэй байна.