Москва дахь Сирийн Элчин сайд Башар Жаафари Оросоос орогнол хүссэнийг "Тасс" агентлаг Даваа гаригт /2025.04.14/ мэдээлэв. Гэхдээ учир шалтгааныг нь тодорхой мэдээлсэнгүй. Үүний дараахан Ливанд төвтэй Ираныг дэмжигч аль-Маяаден суваг мөн л тодорхой тайлбаргүйгээр "Жаафари орогнол хүссэн мэдэгдлийг үгүйсгэлээ" гэв.

Башар Жаафари 15 жилийн турш НҮБ дахь Сирийн байнгын төлөөлөгчөөр ажилласны эцэст 2022 онд ОХУ-д Элчин сайдаар томилогдсон юм. Тэрбээр өдгөө 69 настай.

Сирийн Гадаад хэргийн сайд өнгөрсөн долоо хоногт Жаафари болон Саудын Араб дахь Элчин сайдыг Дамаскт дуудсан гэх мэдээлэл бий. Энэ нь Ассадын дараах дипломат корпусыг өөрчлөн зохион байгуулах ажлын нэг хэсэг аж. Жаафаригийн хувьд өмнөх дэглэмийн үеийн олон улсад хамгийн их танигдсан хүмүүсийн нэг. 14 жилийн турш үргэлжилсэн иргэний дайны хугацаанд тэр Сирийн засгийн газрын талд дуу хоолойгоо өргөдөг байв.

ОХУ хүйтэн дайны эхэн үеэс Сирийг дэмжсэн. 1940-өөд онд Францын колончлолоос гарч, тусгаар тогтнолоо тунхаглах үйл хэргийг нь ОХУ дэмждэг байв. Өдгөө Ассадын дэглэм нуран унасан ч Оросын цэргийн хоёр бааз Сири дэх байрлалаа хадгалсаар байна. Шинэ засгийн газартай холбоо тогтоох замаар байр сууриа хэвээр хадгалж үлдэхийг ОХУ эрмэлзэж буй. Нэмж дурдахад, ОХУ Сирийн удирдагч асан Башар аль-Ассадад өнгөрсөн оны сүүлээр орогнол олгосон билээ.