Хотын төлөвлөлтийг сайжруулж, хүн амын төвлөрлийг харгалзаж нийслэлд өөрчлөлт, зохицуулалт хийх ажлыг шат дараатайгаар хийнэ гэдгийг хотын дарга болон нийслэлийн захиргаанаас мэдэгдсэн. Энэ хүрээнд эхний ээлжид олон жилийн турш эмх замбараагүй үйл ажиллагаа явуулж байсан түргэн үйлчилгээний цэг /ТҮЦ/-үүдийг албадан буулгаж, хураан авч буй. Үүний дараагаар орон сууцны хотхон хорооллын В1 болон нэг давхрын үйлчилгээний зарим байгууллагыг албадан чөлөөлнө гэх яриа цахим хуудаст гарсан. Бид энэ мэдээлэл үнэн эсэх талаар болон хэрэв ийм нөхцөл байдал үүсвэл ямар байр суурьтай байгаа талаар холбогдох албаныхан болон үйлчилгээний байгууллага, худалдаа эрхлэгчдээс асууж, сурвалжиллаа.

"СҮҮЛИЙН 10 ГАРУЙ ЖИЛ ЦАЙНЫ ГАЗАР АЖИЛЛУУЛАХАД 2 УДАА МЭДЭГДЭХ ХУУДАС ИРЖ БАЙСАН"

Бид Цэцэг төвийн эсрэг тал буюу Ард кино театрын ойролцоох орон сууцуудын нэг болон В1 давхарт үйлчилгээ эрхэлж байгаа иргэд, аж ахуй нэгжүүдээс орж дээрх мэдээллийг сонссон эсэх талаар тодрууллаа. Тус хэсэгт үйлчилгээ эрхэлж байгаа ихэнх хүмүүс түрээсийн талбайд үйлчилгээ эрхэлдэг бөгөөд цайны газар, эмийн сан, үсчин, гутал засвар, оёдолчин, камер засвар, хүнсний мухлаг гэхчлэн төрөл бүрийн ахуйн хэрэгцээний төвүүд байгаа юм. Цайны газруудаас албадан нүүлгэлт хэрэв хийвэл та нар дэмжих үү? гэхэд аль ч газар дэмжихгүй гэв. Өөр үйлчилгээний талбай, түрээсийн уян хатан төлбөрийн нөхцөл санал болгосон ч дэмжихгүй. Төр иргэдээ дарамталсан шийдвэр гаргасаар байвал Монгол Улс ардчилсан байдлаа алдана гэдгийг ч шүүмжилж байлаа.

Тус байршилд сүүлийн 4-10 жил цайны газар ажиллуулж байгаа гурван аж ахуй нэгж, иргэн байгаа бөгөөд одоогоор тус мэдээллийг сонсоогүй, ямар нэгэн албадан нүүлгэх, шилжүүлэх хуудас, бичиг ирээгүй гэв.

Мөн 10 жил цайны газраар ажиллуулж байгаа түрээслэгчийн хэлснээр өмнө нь 1, 2 удаа түрээсийн талбайгаа чөлөөлөх, албадан нүүлгэх талаар мэдэгдэх хуудас ирж байсан. Хэрэв нүүлгэх болбол тэмцэнэ гэсэн юм.

Бусад үйлчилгээний байгууллагууд оёдол, үсчин, гутал засварынхан ч хэрэв ийм шийдвэр гарвал огт зөвшөөрөхгүй. Төр ард иргэд, бизнес эрхлэгчдийнхээ амьдралд халдах эрхгүй. Түрээсийн гэрээг 1-3 жилээр хийсэн нөхцөлд албан шийдвэр гарсан ч нүүхгүй гэдэг байр сууриа илэрхийллээ. Учир нь үйлчилгээний төвийг ажиллуулахад хамгийн чухал нь байршил бөгөөд хүнээ татсан, хүмүүсийн орж дадсан газрыг хааж, нүүлгэж шилжүүлэх нь зохисгүйг ч хэлсэн юм.

"ТӨР БУСДЫН ӨМЧИД ХАЛДАХ ХУУЛЬ БУС"

Хувиараа бизнес эрхлэгч, жижиг дунд үйлдвэрлэгчдийг төр дэмжинэ гэдэг ч шийдвэрээрээ хааж, боож, айлган сүрдүүлдэг тогтолцоонд шилжвэл Монгол Улсад бизнес эрхлэх хүн бүү хэл аж ахуй нэгж олдохоо болино гэдгийг иргэдийн төлөөлөл хэлж байна.

Түрээслэгч иргэн:

-Хэрэв ТҮЦ-үүд албадан буулгаж байгаа шиг түрээсийн гэрээтэй, татвар төлдөг аж ахуй нэгж, иргэдийн бизнес эрхлэх боломжийг хязгаарлавал эсэргүүцнэ. Хүний өмчид дураараа халдаж болохгүй. ТҮЦ ч гэсэн хүний өмч. Зарим нь зөвшөөрөлтэй үйл ажиллагаа явуулдаг. Хэрэв цэгцэлж байгаа бол дахин зөвшөөрөл олгохгүй байх, ариун цэвэр, бусад үйлчилгээнд анхаарал, зөвшөөрөлгүйг нь буулгах зохицуулалт хийх нь зөв. Албадан буулгаж байгаа тохиолдолд ажиллуулж байсан хүмүүст нөхөн төлбөр өгөх хэрэгтэй. Хувиараа хүнс, барааны дэлгүүр, лангуу ажиллуулж байгаа хүмүүс дунд зээлгүй хүн байхгүй. Өдөр тутмын бараа, бүтээгдэхүүнээ татах, лангуу тавиур авах гээд эхэлж байгаа хүн бүр зээлээр л босч байгаа. Гэтэл тэр урмыг нь хугалж, төр эзлэн түрэмгийлж халдаж байгаа мэт аашилж болохгүй.

Хувиараа бизнес эрхэлж байгаа нэг хүний ард гэр бүл, өрхийн олон гишүүний амьдрал яригдаж байгаа. Тиймээс бүх зүйлийг хаана, болиулна, албадна гэж дур мэдэн ярьж болохгүй.

Аливаа шийдвэрийг гаргахдаа ард иргэд болоод дараа нь үүсэх үр дагаврыг сайтар тооцож шийдвэр гаргах хэрэгтэй. Тооцоололгүйгээс шийдвэр нь хэсэг хугацаанд хэрэгжиж байгаад замхардаг, хяналт нь сулардаг тохиолдол олон бий. Хотын хүн ам, төвлөрлөө харгалзаж нийслэлээ өнгө үзэмжтэй, зай талбайтай болгоё гэж байгаа бол эмх цэгцээ төлөвлөлттэй зөв хийх нь л чухал. Жирийн ардын өмч рүү дайрч болохгүй.

НЗДТГ: ОРОН СУУЦНЫ НЭГ ДАВХРУУДЫН ҮЙЛЧИЛГЭЭНИЙ ТӨВҮҮДИЙГ НҮҮЛГЭХ ТАЛААР ОГТ ЯРИГДААГҮЙ

Амралтын өдрүүдэд цахим хуудаст ТҮЦ-үүдийн дараагаар орон сууцны хотхон хорооллын нэг давхарт үйлчилгээ эрхэлж байгаа зарим аж ахуй нэгжийг албадан нүүлгэх талаар Хотын захиргаанд яригдаж байгаа гэх мэдээлэл гарсан. Худалдаа эрхлэгчид болоод үйлчилгээний байгууллагынхан хэрэв үнэхээр ийм шийдвэр гарвал хатуу тэмцэнэ гэдгээ илэрхийлж буй. Тэгвэл үнэхээр энэ талаар яригдсан эсэхийг нийслэлээс тодрууллаа.

Улаанбаатар хотын захирагчийн ажлын албанаас тодруулахад, В1, нэг давхрын үйлчилгээний газруудыг нүүлгэн шилжүүлэх талаар огт яригдаагүй. Ийм шийдвэр гараагүй.

Цахим хуудаст ташаа мэдээллүүд гарч байна. ТҮЦ буулгах ажил үргэлжилж байгаа. Үйлчилгээний байгууллагууд, аж ахуй нэгж болон иргэдийн түрээс болон эзэмшигчийн өмчид халдах, албадан шилжүүлэх, нүүлгэх талаар огт яригдаагүй. Түрээс, өмчлөгчийн гэрээтэй хувийн өмчид нийслэл халдах гэж байна гэдэг худал мэдээлэл гэлээ.

Ямартай ч нийслэлээс дээрх мэдээллийг үгүйсгэлээ. Мөн орон сууцны хотхон, хорооллын нэг давхрын үйлчилгээний хэсгүүдэд үсчин, цайны газрын үйлчилгээ явуулахгүй гэдэг худал гэдгийг хэлсэн юм.

ҮЙЛЧИЛГЭЭНИЙ ТӨВҮҮДИЙГ НҮҮЛГЭХ БИШ ХАЯГ, РЕКЛАМЫГ ЦЭГЦЛЭХ ШААРДЛАГАТАЙ!

Хүмүүсийн хэлж байгаагаар аж ахуй нэгж, иргэдэд үйлчилгээ эрхлэх боломжийг төрөөс дэмжих ёстой. Түүгээр зогсохгүй боломжийг нээж өгөх хэрэгтэй байгааг хэлж байна. Татварын хөнгөлөлт, үйлчилгээний чиглэлээс хамаарч зээлийн хүү зэрэгт анхаарч нь чухал.

Нийслэлийн өнгө үзэмжийг сайжруулах талаар арга хэмжээ авч байгаа бол эмх цэгцгүй барилгууд, орон сууцнууд тэр дундаа "авлига хороолол" , алдарт олон жил яригдаж байгаа газар чөлөөлөлтүүдээ хийх, замбараагүй хаяг, рекламыг нэг жигд болгох зэрэг нь зүйтэйг иргэд төдийгүй түрээслэгчид хэлж байгаа юм.

Тиймээс бизнес эрхэлж байгаа, үйлчилгээ явуулж байгаа төвүүдийг цэгцлэхдээ хаягаас эхэлж эмх цэгцтэй болгох нь зүйтэй бөгөөд албадлагын аргаар аж ахуй нэгжүүдэд хязгаарлалт тавихгүй байх нь зүйтэй…

Гэрэл зургийг О.БОЛОРСУВД