Хотын төвийг үзэмжтэй болгох, нийтийн эзэмшлийн гудамж талбайг зориулалтын дагуу байлгах, хотын төлөвлөлтийг сайжруулах үүднээс олон жил яригдсан ТҮЦ-үүдийг цэгцлэх ажлыг нийслэл өнгөрсөн долоо хоногоос эхлүүлсэн. Улаанбаатарт нийтийн эзэмшлийн гудамж талбай, явган хүний зорчих хэсэгт саад учруулж, зөвшөөрөлгүй байршуулсан 1000 гаруй ТҮЦ буюу түргэн үйлчилгээний цэг байгаа гэх албан бус статистик бий. Зөвшөөрөлгүй ТҮЦ буулгах ажил нийслэлийн Баянзүрх дүүргээс эхэлсэн бол зөвхөн Баянгол дүүргийн хэмжээнд гэхэд 110 гаруй ТҮЦ-ийг буулгаад байгаа юм. Цаашид ч албадан буулгах энэ ажил үргэлжилнэ. Тэгвэл иргэд энэ талаар ямар байр суурьтай байгааг тодрууллаа.

Иргэдийн хэлж байгаагаар, ТҮЦ-үүдийг цэгцлэх нь зүйтэй. Татвар төлдөггүй, ариун цэвэр муу, НӨАТ-ын баримт өгдөггүй түргэн үйлчилгээний цэгийг цэгцэлж, хотын гудамж талбайгаа цэвэрлэх нь зөв гэв.

Мөн 30-аад жил үйл ажиллагаа явуулж, зах зээлд шилжих үеэс нийгэмд ноёлж эхэлсэн ТҮЦ-үүдэд удаа дараа үүрэг, чиглэл өгсөн ч буулгаагүй, нүүлгээгүй бол албадан зохицуулалт хийх нь зөв гэдгийг ч иргэд хэлж байна.

Мөн нөгөө талдаа өрхийн санхүү, эдийн засгийн гол хөшүүрэг болж байгааг харгалзаж, хотоос болон дүргүүдээс зохицуулалт хийж, ТҮЦ эрхлэгчдэд өөр үйлчилгээний талбай санал болгох, харилцах тохиролцох хэн хэн нь гомдолгүй байх зохицуулалт хэрэгтэйг иргэдийн зүгээс хэллээ.