АНУ-ын Төрийн департмент өнгөрсөн долоо хоногийн Мягмар гаригт Эль Сальвадорын аялал жуулчлалын салбарыг нэгдүгээр зэрэглэлд хүргэжээ. Тодруулбал, АНУ энэ өдөр тус улсыг дэлхийн аялал жуулчлалын хамгийн аюулгүй газруудын нэг гэж тодорхойлсон юм. Энэ нь Эль Сальвадорын ерөнхийлөгч Наиб Букелегийн эртнээс зорьсон зүйл ажээ.

Тэгвэл Букеле АНУ-аас дахин нэг эрхэм бэлэг хүлээн авах гэж байна. Тэрбээр өнөөдөр /2025.04.14/ Зууван танхимд айлчилж, ерөнхийлөгч Дональд Трамптай уулзах болно. Энэ уулзалт Эль Сальвадорыг дэлхийн тавцанд харуулж, эвслийг улам бэхжүүлэх нь гарцаагүй. Трампийн кампанит ажлын гол амлалт нь цагаачдыг олноор албадан гаргах явдал байсан. Тэгвэл энэ амлалтыг биелүүлэхэд туслах гол түлхүүр нь Букеле аж.

Байдены засаг захиргаа хэдэн жилийн өмнө Букелегийн авторитар тактикийг буруушааж байсан. Тиймээс энэ удаагийн айлчлал Эль Сальвадорын хувьд чухал амжилт.

Сан Сальвадорын их сургуулийн профессор, сэтгүүлч Эдвин Сегура хэлэхдээ "Букелегийн хувьд энэ бол АНУ-аас өгч буй баталгаа. Энэ айчлал түүнийг Никарагуагийн дарангуйлагч Даниель Ортега, Венесуэлийн ерөнхийлөгч Николас Мадуро нараас өөр гэдгийг дэлхий нийтэд харуулах болно. Трамп ч бас хамтран ажиллахаар төлөвлөж, хүсч буй улс төрийн удирдагчаа энэ айлчлалаар харуулж байгаа хэрэг" гэсэн юм.

Уулзалтын үеэр Эль Сальвадортой хамтран ажиллах тухай буюу супер том хэмжээтэй шоронд нь "Трен де Арагуа" болон "MS-13" гэмт бүлэглэлийн гишүүдийг байрлуулах тухай хэлэлцэнэ. Өөрийгөө "Дэлхийн хамгийн догь дарангуйлагч" гэж өргөмжилсөн Букеле тэдэнд "төмөр нүүрийг" үзүүлбээс зургаан сая хүн амтай жижигхэн улсдаа хөрөнгө оруулалт, аялал жуулчлалыг татаж чадна гэж үзэж байна. Тэрбээр АНУ гэлтгүй бусад орноос ч албадан гаргасан хүмүүсийг эх орондоо хүлээн авч сайрхдаг нэгэн.

АНУ-д бараг 2.6 сая сальвадор хүн амьдардаг гэх тооцоо бий. Өөрөөр хэлбэл, эль сальвадорчууд АНУ-ын гурав дахь том испани бүлэг юм. Мөн АНУ-ын мөнгөн гуйвуулга Эль Сальвадорын дотоодын нийт бүтээгдэхүүний бараг дөрөвний нэгийг бүрдүүлдэгийг Дэлхийн банк мэдээлжээ.

Гэмт бүлэглэлийн гишүүдийг байрлуулах асуудлаас гадна Букеле АНУ-ын 10 хувийн тарифыг хөнгөлүүлэх хүсэлт гаргаж магадгүй юм.

Букелег хувийн тоглолт хийхдээ гаргууд нэгэн гэдэг. Энэ зан чанар нь Трампийн онцгой хүлээлтэд хүрдэг ажээ.