ОХУ-ын арми Ням гаригт Украины зүүн хойд хэсгийн Сумы мужид цохилт өгснөөр дор хаяж 32 хүн нас барж, 84 хүн шархдав. Сүүлийн саруудад байгаагүй аймшигт халдлагын улмаас нас барагсдын дунд хоёр ч хүүхэд байжээ. Украины ерөнхийлөгч Зеленский энэ талаар мэдээлэл өгөхдөө "Зөвхөн зулбасганууд л ийм юм хийнэ" гэжээ. Мөн дэлхийн удирдагчдад хандан "Хоосон яриа баллистик пуужин болон бөмбөгдөлтийг хэзээ ч зогсоохгүй. Иймд хүчтэй хариу үйлдэл үзүүлж, гурван жил үргэлжилсэн дайнаа зогсоохыг Оросоос шаардмаар байна" гэв.

Халдлага болсон өдөр нь "Palm Sunday" буюу "Эзний Иерусалим руу орох баяр" гэдэг өдөр байжээ. Энэ өдөр иргэд олноор сүмд очдог.

Европын орнуудын удирдагчид болсон явдалд ундууцаж буйгаа мөн илэрхийлэв. Тухайлбал, Францын ерөнхийлөгч Эммануэль Макрон "Энэ үйл явдал нь ОХУ хүний амь нас, олон улсын хууль тогтоомж, Трампийн дипломат хүчин чармайлтыг үл тоомсорлож байгааг харуулж байна. Дайныг ОХУ л ганцаараа санаачилсан гэдэг хүн бүрийн мэдэх зүйлийг энэ халдлага харууллаа. Бас Орос ганцаараа л дайныг үргэлжлүүлэхийг хүсч байгаа нь тодорхой байна. Гал зогсоохын тулд дорвитой арга хэмжээ авах хэрэгтэй байна. Франц улс түншүүдийн хамтаар энэ зорилгын төлөө зогсолтгүй ажиллаж байна" гэсэн юм.

Харин Европын зөвлөлийн тэргүүн Антонио Коста "Зөвхөн Оросын сонголтоор л энэ дайн өрнөж, үргэлжилсээр байна" гэжээ.

АНУ-ын тусгай элч Стив Виткофф Путинтэй уулзахаар ОХУ-д айлчилснаас хоёр өдрийн дараа энэхүү халдлага болов.

Сумы муж Оросын хилтэй ойр оршдог бөгөөд сүүлийн долоо хоногуудад ойр ойр халдлагын бай болох болжээ. Цогцоснуудыг хотын төв хэсэгт хучиж байрлуулсныг "AFP" агентлагийн сэтгүүлч мэдээлэв. Аврагчид нуранги доороос эрэн хайх ажиллагаагаа үргэлжлүүлсээр байна.

Энэ сард ОХУ томоохон хэмжээний иргэний бүсэд хоёр дахь удаагаа халдаж байна. Тодруулбал, энэ сарын эхээр Крывой Рогт халдсан нь 18 хүний аминд хүрсэн. Трамп энэ талаар үзэл бодлоо илэрхийлж, "ОХУ галзуу юм шиг л бөмбөгдөж байна" гэсэн билээ.