Хоноц хоноцдоо дургүй, хонуулсан айл хоёуланд нь дургүй гэдэг нь болж байна. Учир юу вэ гэвэл “Тавантолгой төмөр зам” ХХК-ийн хяналтын менежер  Э.Тамир компанид нь ажил үүрэг давхардсан орон тоо олон байгаагийн зэрэгцээ муурны хоол, цээживч, шартуулахаас сэргийлдэг ундаа зэрэг олон зүйлийг шахсан байсан талаар өнгөрсөн Баасан гаригт мэдээлэл хийсэн. Дээрх мэдээллийг хийсний дараа компанийнх нь хурган дарга нар түүнийг “ад үзжээ.”

Энэ талаар Э.Тамир “Компанийн зарим хурган дарга нар намайг компани дээрээ ирж чадах болов уу гэсэн байна.  Би хэн нэгэн хувь хүний хувийн компанийн асуудал яриагүй, төрийн өмчит буюу түмэн олон компанийн асуудлыг ярьсан.  Надад ичиж зовох асуудал байхгүй…” гэж мэдэгдсэн юм.

“Тавантолгой төмөр зам” төрийн өмчит компани нь 1000 гаруй ажилтан албан хаагчтай. Компанийнх нь захирал 19 сая төгрөгийн цалин авдаг бол ажилтнууд нь таван сая төгрөгийн цалин авдаг.  Нийт ажилчдынх нь 400 орчим нь МАН-ын эрхтэн дархтануудын сонгуулийн ажилд зарцлагдсан тавиулууд “шахаагаар” очсон гэж УИХ-ын гишүүн Б.Пүрэвдорж мэдэгдсэн.

Уг нь тус компанитай ижил төрлийн үйл ажиллагаа эрхэлдэг төрийн өмчит “Монголын төмөр зам” ХХК бас бий. Засгийн газраас энэхүү үйл ажиллагаа нь давхардсан хоёр компанийг нэгтгэхээ мэдэгдсэн. Эл ажлыг Зам тээврийн сайд Б.Дэлгэрсайхан хариуцаж хийхээр даалгавар авсан. Гэвч өнөөдрийг хүртэл тус компанийг нэгтгээгүйн зэрэгцээ Засгийн газраас хяналтын менежер томилсон.

Төрийн өмчит компаниудад Засгийн газраас менежер томилж байгаад олон нийт шүүмжлэлтэй хандаж байгаа. Гэхдээ төрийн өмчит компани, улсын үйлдвэрийн газруудад менежерээр томилогдсон албан тушаалтнуудаас одоогоор Э.Тамир л компанийнхаа болж бүтэхгүй байгаа асуудлыг сөхсөн. Түүнээсээ болж компанийнхээ хурган дарга нарт ад үзэгдэж эхлээд байна.

Олон нийтийн хувьд төрийн өмчит компаниудыг аль болох цөөлөх ёстой, тэгж гэмээн хулгай, луйвар шахаа нь арилна гэж үздэг. Тиймээс Засгийн газар болон тухайн компанийн Төлөөлөн удирдах зөвлөлөөс хийж байгаа томилгоо бүрт шүүмжлэлтэй хандж ирсэн юм.

Ардилсан нам Засгийн эрх барьсан 2012-2016 оны үед Э.Тамир Хөдөлмөр нийгмийн хагмааллын дэд сайдын алба хашиж байв. Харин өнгөрсөн жилийн сонгуулийн дараа Ардчилсан нам Засгийн газарт хамтарснаар төрийн өмчит компаниудад хяналтын менежер, бүтээмжийн менежер томилоод байгаа. Засгийн газрын шийдвэрийг үндэслэн одоогоор 20 гаруй менежер тус намаас төрийн өмчит компаниудад томилогдоод буй.

Г.ХОРОЛ