Украины арми саяхан Оросын талд тулалдаж байсан хоёр хятад цэргийг олзолсон билээ. Нийт 163 хятад иргэн Оросын талд тулалдаж байсан болохыг үүний дараахан Украины тагнуулынхан мэдээлсэн.

Анхны хятад цэргүүд 2023 оны зун Орост ирсэн байна.

Украины ерөнхийлөгч Зеленский иргэдээ Киевийн эсрэг тэмцэлд нэгдэхийг дэмжсэн, саад болоогүй гэж Хятадыг буруутгажээ. Тэрбээр "Бээжин энэ талаар мэдэж байгаа. Оросууд Хятадын олон нийтийн сүлжээгээр дамжуулан ажилд авах тухай сурталчилгааны бичлэг түгээдэг" гэсэн юм. 2022 онд л гэхэд "Таны өдрийн цалин 30 мянган рубль. Орост тавтай морил" гэх маягаар сурталчилгааг түгээж байжээ.

Харин саяхны бичлэгүүдийг харвал армид бүртгүүлсний урамшуулал болгож 2.3 сая рубль амлажээ. Мөн "Чи бол эр хүн. Цорын ганц нь бай" гэх зэрэг үгсийг хавсаргасан байдаг.

Гэвч Оросын талд тулалдсан хятад цэргүүд тэс өөр үг хэлж байна. Чонгчиноос гаралтай Жао Руй хэвлэлд яриа өгөхдөө "Битгий ийшээ ирээрэй. Ямар ч сайхан зүйл байхгүй" гэсэн байв. Жао Руй арванхоёрдугаар сард Украины нисгэгчгүй онгоцны цохилтод өртөж амиа алджээ.

Бэлтгэл сургуулилалтын үеэр арьс өнгөөр ялгаварлан гадуурхах явдал ч их байдаг гэдгийг өөр нэгэн хятад цэрэг хэлжээ. Тэрбээр "Би хэзээ нэгэн цагт энд үхэж магадгүй гэдгээ ойлгосон тул туршлагаасаа хуваалцахаар шийдсэн. Хятадын ард түмэн дайнд оролцоогүй удсан. Иймд би жирийн нэг цэрэг, тэр дундаа гадаадын цэрэг дайнд яаж оролцдогийг харуулахыг хүссэн. Бэлтгэл сургуулилалтын үеэр өнгөт арьст, араб, хятад цэргүүдийг ялгаварлан гадурухах нь байдаг" гэжээ.

Түүний хэлснээр гадаадын цэргүүдийг ихэвчлэн фронтын хамгийн аюултай шугам руу илгээдэг.

Хятад цэргүүд байлдааны үеэр амь үрэгдвэл ОХУ ар гэрт нь 50 мянган ам.доллар төлнө гэж гэрээ байгуулсан ч үүнийгээ цаг тухайд нь төлөх нь ховор. Түүнчлэн гэрээгээ цуцлах гэхэд нь зөвшөөрөөгүй тохиолдол ч гарчээ. Дайнд ялж байж л гэрээгээ цуцлах боломжтой гэдгийг нэгэн хятад цэрэг ярьжээ.