Кремльтэй холбоотой нефть тээвэрлэгч хөлөг онгоцыг Эстонийн эрх баригчид Баасан гаригт Таллины ойролцоо саатуулсан байна. Энэхүү үйл явдал нь Балтын орнууд Оросын “сүүдрийн флотыг” шууд онилсон анхны тохиолдол болсон гэж ажиглагчид үзэв. Тодруулбал, Кивала нэртэй хөлөг онгоц Жибути улсын далбаан дор үйл ажиллагаа явуулж байжээ. Гэвч далбаагаа намируулаагүй байсныг эх баригчид илрүүлсэн.

Далай, тэнгисийн хуульд ямар ч төрлийн хөлөг онгоц далбаагаа намируулахгүй байх нь хууль зөрчсөн үйлдэл юм.

Хэдийгээр тус хөлөг онгоцны багийнханд туг намируулах гэрчилгээ олгосон байсан ч Жибути тэнгисийн цэргийн удирдлагаас Кивала хөлгийг улсын бүртгэлд бүртгэгдээгүй гэж мэдэгдсэн байна.  Хил хамгаалах, цагдаагийн ерөнхий газрын дэд дарга Вейко Коммусаар хэлэхдээ, "Үнэн хэрэгтээ, иймэрхүү хөлөг онгоцыг далайд гарахыг хориглодог. Эстони улс Кивали хөлөг онгоцыг саатуулж, шалгах эрхтэй" гэсэн юм. Учир нь Европын холбооноос Кивалаг хориг арга хэмжээнд оруулсан байдаг бөгөөд хамгийн сүүлд Канад, Швейцарь, Их Британийн хориг арга хэмжээнд өртсөн байжээ.

Эрх баригчид тус хөлөг онгоцыг шалгасны дараа Оросын Усть-Луга боомт руу явж байсныг нь олж мэджээ.

Оросын эрх баригчид олон улсын хориг арга хэмжээнд өртөхгүй байхын тулд өөр орны нэр дор нефт тээвэрлэдэг гэж ажиглагчид үздэг. Үүнийг сүүдрийн флот гэж нэрлэж буй. Одоогийн байдлаар, Кивала хөлөг онгоц шалгагдаж дуусах хүртэл гурван тэнгисийн цэргийн хөлөг онгоц хяналт доороо байлгаж байна. Түүнчлэн сүүлийн нэг жилийн хугацаанд Финландын буланд зохих ёсны бичиг баримтгүй хөлөг онгоцнууд нефт тээвэрлэх нь олширсон болохыг Коммусаар онцлон тэмдэглэжээ. Тэрбээр хэлэхдээ, "Кивала нь Балтын тэнгисээр ачаа тээвэрлэхийг нь хориглосон сүүдрийн флотын нэг хэсэг гэдэг нь маш тодорхой байна" гэв. Тус хөлөг онгоцны эзэн нь Маврикид төвтэй "Tirad Shipping" компани бөгөөд зөвхөн Кивала хөлөг онгоцыг ажиллуулдаг.