Украины армийн командлагч Александр Сирський Лхагва гаригт хэвлэлд ярилцлага өгөхдөө "ОХУ тус улсын зүүн хойд хэсэгт шинэ довтолгоо эхлүүлсэн" гэлээ. Мөн дайралт их хэмжээгээр нэмэгдэж байгаа гэв.

Ерөнхийлөгч Зеленский өмнө нь Оросын арми Харьков, Сумы бүс нутагт довтлохоор бэлтгэж байгааг анхааруулсан билээ. "Ерөнхийлөгчийн туйлын зөв, энэ довтолгоо аль хэдийнэ эхэлсэн гэж би хэлэх байна. Сүүлийн хэдэн өдөр, бараг долоо хоногийн турш фронтын бүх чиглэлд дайсны довтолгооны тоо хоёр дахин нэмэгдэж байгааг бид ажиглаж байна" гэж Сирський хэлэв.

АНУ-ын ерөнхийлөгч Дональд Трамп "Болж байгаа зүйлд сэтгэл хангалуун бус байна. Орос одоо галзуу юм шиг л бөмбөгдөж байна" гэжээ.

Харин нөгөө талд Украины арми Белгородод шинэ фронт нээгээд буй. Украины арми Белгород руу нэвтрэхээр оролдож байгаа талаар ОХУ өнгөрсөн сард мэдээлж байв. Зеленский Белгород мужид байрлуулсан довтолгооны 225 дугаар анги нэгтгэлд ил тодоор талархал илэрхийлж, "Сайн байна, залуус аа! Би Украины төлөө тэмцэж байгаа хүн бүрээр бахархаж байна" гэжээ.

Украины арми Демидовка, Прилесье тосгон руу довтлохыг завдсан ч тэднийг таслан зогсоож чадсан гэж ОХУ мэдэгдсэн. Гэхдээ цэргийн блоггеруудын мэдээлж буйгаар, Украины хилээс хоёр километрийн зайд орших Демидовка хотод тулаан үргэлжилж байгаа аж.

Дайны судалгааны хүрээлэнгийн мэдээлснээр, энэ долоо хоногийн Даваа гаригийн байдлаар Белгород мужийн 12 км2 талбай, Курск мужийн 60 км2 талбай Украины мэдэлд байна.