Аялал жуулчлалын улирлыг эхлүүлж, дөрөвдүгээр сарын хоёр дахь долоо хоногт үндэсний болон олон орны хоолны соёлыг иргэд, жуулчдад таниулах “UB food” фестивалийг төв талбайд үргэлжилж буй. “UB food” фестиваль энэ сарын 8-14-нд Сүхбаатарын талбайд болох бөгөөд олон сонирхолтой хөтөлбөр арга хэмжээг агуулсан гэдэг утгаар хүний хөолд дарагдаж буй.

Тус фестивалиар Бүгд найрамдах Узбекистан улсын хоолны амт, соёлыг онцлохын зэрэгцээ өнөөдөр Монголын бурхан шашинтны төв Гандантэгчинлэн хийдийн лам нар нэг тонн хэмжээтэй ширмэн тогоонд гурилтай шөлийг уламжлалт аргаар бэлтгэж, монгол хоолны соёлыг түгээж байна.

Гэхдээ талбай дээр зорин очсон хүмүүс урт цуваанд оочерлож, стресс ихтэй байгааг шүүмжилж байна. Хэдийгээр анх удаа зохион байгуулж байгаа тус нэгдсэн арга хэмжээ нь хүмүүсийн сонирхлыг ихэд татаж байгаа ч үйлчилгээ хангалттай биш байгааг иргэд цахим хуудастаа ч бичиж байгаа юм.

Мэдээж алдаа дутагдалтай ч авах гээхийн ухаанаар хандах нь зүйтэй бизээ. Анхлан зохион байгуулж буй хоолны фестиваль ямартай ч эхний хоногуудад амжилттайгаар жуулчдын анхаарлыг татаад байгаа нь авууштай.

Өдөрлөгт очсон иргэд олон үндэстний амтат хоолыг мастер тогоочдын бэлтгэснээр төрөлх амт, жорынх нь дагуу амтлах боломжтой. Жишээлбэл, Узбекистан үндэстний алдарт плов, шашлык, казань кебаб, самса тэргүүтнийг Узбек мастер тогооч өөрийн жорын дагуу бэлтгэж, иргэд, жуулчдад таниулна. Мөн залуучуудад зориулсан Dj үзүүлбэр, Open Mic, “Бага тойрог” урлагийн тоглолт, Узбек бараа бүтээгдэхүүний худалдаа, Улаанбаатар театрын тоглолт, “Анир” поп оркестрын тоглолт, амьд хөгжмийн тоглолт, төрөл бүрийн хоолны тэмцээнүүд болж байгаа юм.