Нийслэлийн хэмжээнд нийт 1000 орчим сургууль, цэцэрлэг үйл ажиллагаа явуулж байна. Үүнд 40 мянга гаруй багш ажилчид, 530 гаруй мянган хүүхэд суралцаж байгаа аж. Нийслэлийн сургууль, цэцэрлэгийн 488 барилгын объект байгаагаас 70 орчим хувь нь ойролцоогоор 70 жилийн насжилттай буюу хуучны сургууль, цэцэрлэгийн барилгууд байгааг албаныхан хэлж байна. Үүнтэй холбоотойгоор сургалтын орчинд ашиглах орчин үеийн тоног төхөөрөмж, орчны аюулгүй байдалтай холбоотой газар чөлөөлөлт, зам, дэд бүтэц, камержуулалт зэрэг олон ажлуудыг шинээр шийдвэрлэх, сайжруулах шаардлагатай байгаа аж.

Мөн "2026 онд боловсролын багц хуулийг хэрэгжүүлж, амилуулахаар төлөвлөж байна. Өнөөдөр тулгамдаад байгаа боловсролын тэгш хүртээмж, хүүхдийн сурах таатай орчныг бүрдүүлнэ. 2030 он гэхэд 88 мянган хүүхэд улс даяар нэмэгдэнэ.

Тиймээс ЕБС, цэцэрлэгийн тоо хэмжээг нэмэгдүүлнэ. Тэдэнд 108 сургууль 95 цэцэрлэг хэрэгтэй. Үүн дээр үндэслэсэн төсөв тогтооно. Багшийн дутагдлаас гаргах, багшийг хөгжүүлэх хөтөлбөрүүдийг нэмэгдүүлнэ. Хүн амын нягтралыг тооцоолон хаана, хэдэн сургууль, цэцэрлэг хэрэгтэйг хиймэл оюун ашиглан тооцоолсон. Боловсрол хүний нөөцтэй шууд холбоотой. Манай улсад хүний нөөцийн ноцтой дутагдал үүслээ. Тиймээс хэд хэдэн шинэчлэлт хийнэ. Хөтөлбөрийн шинэчлэлт, цахим шинэчлэлт, санхүүгийн шинэчлэл, багшийн гурван тулгуурт шинэчлэлт гээд хэд хэдэн шинэчлэлт хийнэ. Мөн Хүний нөөцийн асуудалд анхаарал тавьж ажиллана. Боловсролыг дэмжих жил бол эдийн засгийг өөрийг нь дэмжих, салбар дундын уялдаа холбоог шинэчлэх жил байх болно" гэдгийг Боловсролын сайд П.Наранбаяр хэлсэн юм.