Японы Батлан ​​хамгаалахын сайд Накатани Германд байрладаг Украины төлөөлөгчийн газарт НАТО-ийн командлалд оролцох хүсэлтэй байгаагаа Мягмар гаригт мэдэгдлээ. Энэ нь тэдний хувьд Европын холбоотнуудтай харилцах харилцаанд нь томоохон түлхэц болох юм.

Дайн эхэлснээс хойш Япон улс Украинд батлан хамгаалахын багагүй тусламж үзүүлсэн. Харин одоо Германы Висбаден хотод байрладаг Украины аюулгүй байдлын тусламж, сургалтын бааз "NSATU"-д элсэх хүсэлтэй байна. Энэ хүрээнд Японы Өөрийгөө хамгаалах хүчнээс Висбаден руу төлөөлөгч илгээх зэргийг хэлэлцэж болох ч гэлээ дэлхийн хоёрдугаар дайнаас хойш мөрдсөн Японы армийн оролцоог хязгаарладаг уламжлал бий. Тус уламжлалын дагуу Японы аливаа хамтын ажиллагаа байлдааны оролцоотой байх ёсгүй юм.

Батлан ​​хамгаалахын сайд Накатани хэлэхдээ "Япон НАТО-той аюулгүй байдлын хамтын ажиллагаагаа цаашид гүнзгийрүүлэхийг хүсч байна. Украины аюулгүй байдлын тусламж, сургалтын баазад нэгдэх нь бидэнд Орос, Украины дайнаас сургамж авах боломж олгоно. Япон, НАТО хоёулаа олон сорилттой тулгараад буй. Аюулгүй байдлын орчин улам л хэцүү болж байна" гэжээ.

Харин НАТО-ийн тэргүүн Марк Рутте "НАТО болон Японы харилцааг кибер хамгаалалт, далайн аюулгүй байдал, батлан ​​хамгаалах аж үйлдвэрийн хамтын ажиллагаа зэрэг олон салбарт гүнзгийрүүлнэ гэж найдаж байна" гэв.

НАТО сүүлийн жилүүдэд "IP4" гэгддэг Япон, Өмнөд Солонгос, Австрали, Шинэ Зеландтай харилцаагаа эрчимжүүлэх болсон. Энэ хүрээнд тус дөрвөн улсын албаныхан НАТО-ийн сайд нарын болон дээд хэмжээний уулзалтад оролцох болсон билээ.