НЭМЭЛТ: 

УИХ-ын Ёс зүй дэгийн байнгын хорооны хуралдаан өнөөдөр болж, УИХ-ын гишүүн Х.Баттулгын цалинг зургаан сарын хугацаатай 20 хувь хасах шийтгэл ногдууллаа. Харин УИХ-ын гишүүн М.Нарантуяагийн зөрчлийг хэлэлцэхээс татгалзав. Сошиалд болсон "хэл ам"-ыг Байнгын хорооны хуралдаанаар хэлэлцэх нь зохисгүй гэж үзсэн юм.  Ингэхдээ Байнгын хорооны даргын зүгээс УИХ-ын гишүүн М.Нарантуяаг харилцаан дээрээ анхаар гэдэг зөвлөмж өгсөн байна. Мөн УИХ-ын гишүүн Х.Баттулгын УИХ-ын намрын чуулганы хугацаанд 67 цаг хуралдаандаа суугаагүй юм. Түүний цлаинг гурван сарын хугацаатай 20 хувиар хасах саналыг ажлын хэсгээс оруулж ирсэн ч Байнгын хорооны гишүүд зургаан сараар хасах ёстой гэж үзэн, шийдвэрлэлээд байна.

Х.Баттулга, М.Нарантуяа-Нара нарт сахилгын шийтгэл онооно

УИХ-ын 2025 оны хаврын ээлжит чуулганы хуралдаанаар хэлэлцэх асуудлын тов, дараалаллын дагуу өнөөдөр /2025.04.09/ Лхагва гаригт Ёс зүй, дэгийн байнгын хорооны хуралдаан болно. Өнөөдрийн хуралдаанаар, 

• Байнгын хорооны тогтоолын төсөл /Ёс зүйн хариуцлага ногдуулах тухай/
• Байнгын хорооны тогтоолын төсөл /Ёс зүйн хариуцлага ногдуулах тухай/ хэлэлцэх аж.

Тодруулбал, УИХ-ын гишүүн Х.Баттулга, М.Нарантуяа-Нара нарт оноох сахилгын шийтгэлийг хэлэлцэх юм байна. 

Энэ талаар УИХ-ын гишүүн А.Ариунзаяа "Ёс зүй, дэгийн байнгын хорооны хаврын чуулганы анхны хуралдаан өнөөдөр болно. Товын дагуу 14:00 цагт хуралдана. Хэлэлцэх асуудлын хувьд Байнгын хорооны тогтоолын хоёр төслийг хэлэлцэнэ. Нэгдүгээр тогтоолыг миний бие танилцуулна. Тодруулбал, өнгөрсөн намрын чуулганы сүүлийн хуралдаан дээр Ёс зүй, дэгийн байнгын хорооны дарга Б.Баярбаатар гишүүдийн ирцтэй холбоотой асуудлыг судалж, хариуцлага тооцох даалгавар өгсөн. Үүний дагуу ажиллахад 2024 оны арванхоёрдугаар сарын 31-ний байдлаар чуулганы үйл ажиллагаанд ямар нэгэн хүндэтгэх үзэх шалтгаангүйгээр оролцоогүй, чөлөө аваагүй гишүүдийн ирцийг авч үзэхэд 40-өөс дээш цаг тасалсан нэг хүн байгаа буюу Х.Баттулга гишүүн байна. Тиймээс журмаар олгогдсон байгаа гурван төрлийн сахилгын шийтгэлээс цалингийн 20 хувийг гурав хүртэлх сараар хасах гэсэн сонголтыг хийсэн байгаа. 

Тухайлбал, эдгээр сахилгын шийтгэлд нэгдүгээрт сануулах, хоёрдугаарт иргэд, сонгогчдоос уучлалт гуйх, гуравдугаарт цалингийн 20 хувийг 6 хүртэлх сараар хасах гэсэн сонголт байдаг. Тиймээс дээрх шийтгэлийг оруулж ирсэн байгаа, байнгын хорооны хуралдаанаар шийднэ.

Хоёрдугаарт, УИХ-ын гишүүн М.Нарантуяа-Наратай холбоотой асуудал байгаа. Б.Баярбаатар дарга М.Нарантуяа-Нара гишүүнтэй уулзаж, ярилцсан байна лээ. Тодруулбал, иргэд сонгогчдоо сошиалаар доромжилсон асуудлыг иргэд шүүмжилсэн учраас гэдэг асуудал яригдаж байна. Мөн энэ нь нэг удаагийн үйлдэл биш учраас гэдгийг Б.Баярбаатар дарга хэлж байгаа. М.Нарантуяа-Нара гишүүний асуудлыг хариуцсан ажлын хэсэг тогтоолын төслөө мөн боловсруулаад оруулж ирж байгаа" гэлээ.