АНУ-ын дэд ерөнхийлөгч Ж.Д.Вэнс өнгөрсөн Пүрэв гаригт "Fox News" хэвлэлд ярилцлага өгөхдөө Дональд Трампийн тарифын нэмэгдлийг хамгаалсан үгс хэлсэн. Гэвч түүний хэл халтирч, "АНУ Хятадын тариачдаас мөнгө зээлж байна" гэж хэлсэн нь хоёр том гүрний харилцааг улам хурцатгахад хүрээд байна. Тодруулбал, "Бид Хятадын тариачдаас мөнгө зээлж, тэдний үйлдвэрлэдэг зүйлийг худалдаж авдаг" гэж Ж.Д.Вэнс хэлжээ.

Энэ үг Хятадын олон нийтийн мэдээллийн хэрэгслээр шуугиан тарьж, эрх баригчдын анхаарлыг татав. Хятадын Гадаад хэргийн яамны хэвлэлийн төлөөлөгч Лин Жиан Мягмар гаригт мэдээлэл өгөхдөө Вэнсийн хэлсэн үгийг "цочирдом бөгөөд гунигтай" гэж тодорхойлжээ. Мөн Вэнсийг "мунхаг, эелдэг бус" гэжээ.

Эсэргүү үгнийх нь төлөө түүнийг Хятадад нэвтрүүлэхийг хориглох ёстой гэж үзэж буй хүмүүс ч байна. "Weibo" платформд нэгэн хэрэглэгч "АНУ-ын засгийн газрын гол хүний ​​хувьд Вэнс ийм зүйл ярих нь үнэхээр ичмээр юм" гэжээ.

Эргэн сануулахад, Дональд Трамп Хятадад Мягмар гариг гэхэд 34 хувийн гаалийн татвараа цуцлах эцсийн хугацаа олгосон. Эс бөгөөс импортын бараанд 50 хувийн татвар ногдуулна гэж мэдэгдсэн билээ. Энэ шийдвэр бодит болон хэрэгжвэл АНУ-ын компаниуд 104 хувийн татвартай нүүр тулах болоод буй. Харин Хятад улс "Трампийн дээрэлхүү үйлдлийн эсрэг эцсээ хүртэл тэмцэнэ. Бид эдийн засгийн худалдааны харилцааны талаарх байр сууриа маш тодорхой илэрхийлсэн" гэжээ.