Ардчилсан намын ерөнхий нарийн бичгийн даргаар УИХ-ын гишүүн асан Н.Ганибалыг томилоод байна. Тодруулбал, Ардчилсан намын Үндэсний бодлогыг хорооны өнөөдрийн /2025.04.07/ хуралдаанаас Н.Ганибалыг тус намын ерөнхий нарийн бичгийн даргаар батламжилсан юм.

УИХ-ын 2024 оны сонгуульд зүүн бүсэд өрсөлдөн ялагдсаныхаа дараагаас тэрбээр Ардчилсан намын ерөнхий нарийн бичгийн даргын үүрэг гүйцэтгэгч болсон.

Улаанбаатар их сургуулийг хэрэглээний математикч мэргэжлээр төгссөн тэрбээр 2020-2024 онд УИХ-ын гишүүнээр сонгогдон ажиллаж байв. Түүнээс өмнө ШУТИС-ийн Сүхбаатар аймаг дахь Технологийн сургууль, математикийн багш, компьютерийн ухааны секторын эрхлэгч, Сүхбаатар аймгийн Засаг даргын зөвлөх, Хүнс, хөдөө аж ахуйн яамны МААБХЗГ-ын дарга, Зам тээврийн хөгжлийн яамны ТЗУХЭЗГ-ын дарга, Ардчилсан Намын Хэрэг эрхлэх газрын дэд дарга, намын байгуулалтын газрын дарга зэрэг алба хашиж ирсэн байдаг.

Түүнийг Ардчилсан намын генсекээр томилсонд зарим гишүүн нь шүүмжлэлтэй хандаж буй. Тухайлбал, тус намын гишүүн Д.Мөнх-Эрдэнэ “Генсек гэдэг чинь боловсролтой мэдлэгтэй, олонд танигдсан, дайчин, шударга, үндэсний хэмжээнд хүлээн зөвшөөрөгдсөн хүнийг тавьдаг биздээ. Гэтэл УИХ-ын 2024 оны сонгуульд Хэнтий, Дорнод, Сүхбаатар аймагт Ардчилсан намаас 7, Ардын намаас мөн 7 хүн нэр дэвшихэд хамгийн сүүлд 14-т орж өвдөг шороодсон хүнийг томиллоо. 2028 онд тэр намын жагсаалтаар нэр дэвшин УИХ-ын гишүүн болно” гэж шүүмжилсэн юм.

Г.ХОРОЛ