Японы эзэн хаан Нарүхито, хатан хаан Масако нар өнөөдөр /2025.04.07/ дэлхийн хоёрдугаар дайн дууссаны 80 жилийн ойд зориулсан арга хэмжээний хүрээнд Номхон далайн Ивото аралд айлчиллаа. Токио хотоос өмнө зүгт 1250 км-ийн зайд орших Ивожима арал буюу одоогийн нэршилээр Ивото аралд АНУ, Японы хооронд ширүүн тулаан болж байв. АНУ-ын цэргүүд 1945 оны хоёрдугаар сард арал дээр ирснээс хойш тулаан нэг сар орчим үргэлжилж байжээ. Энэ тулаанаар 21900 орчим япон, 7000 америк цэрэг амь үрэгдсэн гэдэг.

Өмнө нь 1994 онд эзэн хаан Акихито, хатан хаан Мичико нар дайн дууссаны 50 жилийн ойг тохиолдуулан тус аралд очиж хүндэтгэл үзүүлж байв.

Эзэн хаан Нарүхито, хатан хаан Масако нарын хувьд алслагдмал аралд анх удаа айлчилж байна. Тэд тулаанд амь үрэгдэгсдийн хөшөөнд хүндэтгэл үзүүлжээ.

Эзэн хаан Нарүхито, хатан хаан Масако нар зургадугаар сард Японы өмнөд Окинава мужид айлчилна. Окинавагийн тулаанд тухайн үеийн хүн амын дөрөвний нэг орчим нь амиа алдаж байжээ. Эзэн хаан, хатан хаан хоёр үргэлжлээд мөн сардаа Хирошимад, есдүгээр сард Нагасакид тус тус айлчлах товтой байна.