АНУ-ын 22 мужид улаанбурхан өвчний 642 тохиолдол бүртгэгдэж, хоёр хүүхэд нас бараад буйг тус улсын эрх баригчид Ням гаригт мэдээллээ. 642 тохиолдлын дийлэнх буюу 499 нь Техас мужид байгаа аж. Нас баралтын анхны тохиолдол хоёрдугаар сарын сүүлээр Техас мужид гарсан. Хоёр дахь тохиолдол мөн Техас мужаас бөгөөд тухайн хүүхэд "хүндрэлтэй" гэсэн оноштойгоор эмнэлэгт хэвтэн эмчлүүлж байжээ. Тухайн хүүхэд нь ямар нэг ужиг хууч өвчингүй, вакцинд хамрагдаагүй хүүхэд байсан гэв.

АНУ-д сүүлийн 10 жилийн хугацаанд улаанбурхан өвчнөөр хүн эндээгүй байсан.

Тус улсын Эрүүл мэндийн сайд Роберт Кеннеди өнгөрсөн хугацаанд вакцины ач холбогдлыг үл ойшоосон мэдэгдлүүд хийсэн нь эрүүл мэндийн мэргэжилтнүүдийн санааг зовоож байв. Гэхдээ Кеннеди Ням гаригт мэдэгдэл хийхдээ "Улаанбурхан өвчний тархалтаас урьдчилан сэргийлэх хамгийн үр дүнтэй арга бол вакцин юм" гэжээ. Харьяа яамны Эрүүл мэнд, хүний үйлчилгээний хэлтэс болон Өвчнийг хянах, урьдчилан сэргийлэх төв хамтарч Техас мужид вакцин тараах ажлыг зохион байгуулж байгааг мөн мэдээллээ.

Нийт өвчлөгсдийн 97 хувь нь улаанбурханы эсрэг вакцинд хамрагдаагүй өвчтөнүүд байна. Харин насны хувьд 196 нь таваас доош насны, 240 нь 5-19 насныхан, 159 нь 20 ба түүнээс дээш насныхан байна.

Гурав ба түүнээс дээш тохиолдлыг дэгдэлт гэж нэрлэдэг ба АНУ-д 2025 оны байдлаар зургаан удаагийн дэгдэлт бүртгэгджээ. Харин 2024 онд 16 удаагийн дэгдэлт бүртгэгдсэн байна.