Оросын хамгийн алдартай цуврал алуурчдын нэг Александр Пичушкин дахин 11 хүн амины хэрэг үйлдсэн гэдгээ хүлээн зөвшөөрчээ. "Алхтай маньяк" гэгддэг түүнд 48 хүний амийг хөнөөсөн хэргээр бүх насаар нь хорих ял оноосон байдаг. Тэрбээр өдгөө Оросын сөрөг хүчний удирдагч Алексей Навальный өнгөрсөн оны хоёрдугаар сард нас барсан Арктик дахь чанга дэглэмтэй шоронд хоригдож байгаа юм. Оросын Цагдан хорих албаны (FSIN) хэвлэлийн хэлтсийн мэдээлснээр, "Пичушкин Москва хотын Хойд Бутово дүүрэгт дахин 11 эрэгтэй, эмэгтэй хүнийг хөнөөсөн хэргээ хүлээхэд бэлэн байгаагаа илэрхийлсэн. Энэхүү чухал мэдээллийг FSIN-ийн ажиллагааны газар болон ОХУ-ын Дотоод хэргийн яамны Гэмт хэрэг мөрдөх ерөнхий газрын хамтын ажиллагааны үр дүнд олж авлаа" гэжээ.

Александр Пичушкин 2006 онд баривчлагдаж, 2007 онд 48 хүний ​​амийг хөнөөсөн, гурван хүний ​​амь насыг бүрэлгэхийг завдсан хэрэгт буруутгагдан бүх насаар хорих ялаар шийтгүүлсэн байдаг.

Саяхан 11 хүний амийг хөнөөсөн гэдгээ хүлээн зөвшөөрснөөр аллагын бодит тоо 59 болсон аж. Тэрбээр шатрын хөлөг дээрх квадрат мэт 64 хүнийг алах зорилготой байсан бөгөөд уг зорилгодоо хүрсэн эсэх нь одоог хүртэл эргэлзээтэй юм. Пичушкин 1992 оноос эхлэн гэмт хэргээ үйлдэж, 15 жилийн дараа баригдсан байдаг.

Хохирогчдын ар гэрийнхэн түүнд цаазаар авах ял оноохыг хүссэн ч 1996 онд Орос улс Европын зөвлөлд элссэнээр бүх насаар нь хорих ял оногдуулжээ.

Пичушкин гэмт хэрэг хийсэндээ хэзээ ч харамсдаггүй учир түүнийг сэтгэцийн эмчилгээнд хамрагдуулдаг байна. Хүний амь насыг бүрэлгэх арга нь их энгийн бөгөөд хохирогчдоо алхаар цохиж, дараа нь бохирын хоолой руу цогцсыг нь шиддэг байжээ. Хамгийн анхны шүүх хурал дээр Пичушкин өөрийгөө өмгөөлөхдөө, "Хэрэв би баригдаагүй байсан бол хэзээ ч зогсохгүй байсан. Хэзээ ч үгүй. Тэд олон хүний ​​амийг аварч чадлаа" гэж хэлж байжээ.