АНУ-ын ерөнхийлөгч Дональд Трампийн зарлигаар импортын бараа бүтээгдэхүүнд 10 хувийн татвар ногдуулах тариф хэрэгжиж эхэллээ. Тэрбээр Лхагва гаригт (2025.04.02) мэдэгдэхдээ, Бямба гаригаас эхлэн бүх улс орнуудад хамгийн багадаа 10 хувийн татвар ногдуулна гэсэн байдаг. Мөн АНУ-ын бараа бүтээгдэхүүний борлуулалт муу байдаг 60 орчим улс орон, бүс нутагт суурь татвараас илүү их хэмжээний татвар ногдуулах болсон.

Тодруулбал Япон улс 24 хувь, Хятад улс 34 хувийн татвар төлөх бөгөөд энэ нь дөрөвдүгээр сарын 9-нөөс хэрэгжиж эхэлнэ.

Дэлхийн эдийн засаг, хөрөнгийн зах зээлийг донсолгосны хариуд Хятад улс АНУ-ын импортын бүх бараанд 34 хувийн нэмэлт татвар ногдуулахаа Пүрэв гаригт зарласан байдаг. Үүний дараа Трамп өөрийн цахим хуудсаараа дамжуулан “Миний бодлого хэзээ ч өөрчлөгдөхгүй. Хятад буруу тоглосон, тэд сандарсан" гэж онцлон тэмдэглэсэн юм. Гэвч Трамп суурь татварын талаар зарласан үеэс хойш дэлхийн хэмжээнд хувьцааны үнэ хоёр өдөр дараалан уналаа. Улмаар шинэ татварыг бууруулах, эсвэл хэрэгсэхгүй болгохыг хөрөнгийн зах зээлийн томоохон группүүд уриалж буй. Худалдааны дайн эрчимжиж байгаатай холбогдуулан дэлхийн эдийн засгийн төлөв хэрхэн өөрчлөгдөх нь түгшүүр дагуулаад байна.