Улаанбаатар хотынхны хүнсний хэрэгцээнд зориулж, энэ жил нийт 10 мянган тонн нөөцийн мах бэлтгэсэн бөгөөд өнгөрсөн хоёрдугаар сарын 15-наас эхлэн худалдаанд гаргасан. Тэгвэл өнөөдөр, маргааш хоёр өдөр нийслэлийн есөн дүүргийн 32 байршилд махны өргөтгөсөн худалдаа зохион байгуулах юм. Хонины махыг гулуузыг нь 1 кг нь 11800 төгрөгөөр худалдана.

Энэ жилийн хувьд үхрийн болоод хонины махыг нөөцөд бэлтгэсэн. Хонины махыг 1 кг нь 11800 төгрөгийн үнэтэй бол үхрийн мах 1 кг нь 13800 төгрөгийн үнээр борлуулагдаж буй. Өргөтгөсөн худалдаагаар зөвхөн хонины махыг гулуузаар нь борлуулах юм.

Сар шинийн баяр дөхүүт махны үнэ өсч, нэг кг үхрийн мах 25 мянган төгрөгт хүрсэн. Засгийн газраас тодорхой зохицуулалт хийж хэсэг хугацаанд экспортод гаргаж байсан махны нийлүүлэлтийг зогсоосон бол нийслэлээс нөөцийн махыг борлуулах ажлыг зохион байгуулсан. Жил бүрийн хаварт махны үнэ өсдөг бол энэ жилийн тухайд буугаад байгаа юм.

Г.ХОРОЛ