"Монгол арт" галерей Монголын Урчуудын эвлэлийн нэрэмжит шагналт зураач Лувсандоржийн Бавуудорж агсны уран бүтээлийн "Сар нарны дор" нүүдлийн үзэсгэлэнг Говь-Алтай аймагт дэлгэх гэж байна. Тодруулбал, энэ жилийн нүүдлийн үзэсгэлэнг 2025 оны дөрөвдүгээр сарын 10-27-ны өдрүүдэд Алтай хотын "Жангар" музейд нэрт зураачийн 40 орчим уран бүтээлийг дэлгэн, олны хүртээл болгох гэнэ.

Түүний замналыг товчхон танилцуулбал, 1966-1969 онд Говь-алтай аймгийн Урчуудын эвлэлийн салбарт зураач, 1972-76 онд Улаанбаатар хотын Монголын урчуудын эвлэлийн салбарт зураач, 1980-1985 онд эх загварын зураач, 1985-1992 онд Монументаль чимэглэлийн үйлдвэрт зураач, 1992 оноос бие даасан уран бүтээлчээр ажиллажээ.

Тэрээр 1976-1980 онд УБИС-ийн уран зургийн ангид суралцаж, Монгол Улсын Төрийн шагналт, Ардын зураач Г.Одон зэрэг багш нарын номын дууг сонсч байсан бөгөөд 1967 оноос хойш эх орондоо байгуулагдсан уран бүтээлийн үзэсгэлэн, ОХУ, Болгар, Франц, Хонг Конг, Япон, Солонгос, АНУ, Куба, Румынд дэлгэсэн уран бүтээлийн үзэсгэлэнд амжилттай оролцож, эх орондоо төдийгүй хилийн чанад нэрд гарсан уран зураач байлаа.

Монголын урчуудын эвлэлийн арт галерейд 1995, 2008 онуудад "Сар, нарны доор" хэмээх уран бүтээлийн бие даасан үзэсгэлэн гаргаснаараа өөрийн гэсэн уран бүтээлч эрэл, өнгө төрхтэй том зураач гэдгээ харуулсан байдаг.

Нэрт зураач Л.Бавуудоржийн "Эх" хэмээх бүтээл Монголын уран зурагт сэтгэхүйн эргэцүүлэл аясыг бий болгосон гавьяатай гэдгийг судлаачид онцлон тэмдэглэдэг. Тэрээр энэ алдартай бүтээлээрээ тал нутгийн байгалийн уян налархай хэмлэл,  айзам хөгийг олж чадаад,  үүн дээрээ үндэслэн бус аргалай замт дүр бүтээсэн нь учир шалтгааны төдийгүй, үйлдлийн аль ч талаасаа зөвхөн л уран сайхны хийсвэрлэлийн үр дагавар төдийхөн биш, уран бүтээлчийн эрэл олз, олон хүчин зүйлийн тээлд тэрхэн торгон агшинг зураглан амилуулж бүтээсэн тухай судлаачид хэлж, тайлж байв.