Өмнөд Солонгос улс ерөнхийлөгчөө огцруулахаар импичмент зарлаад 122 хоносны эцэст өнөөдөр /2025.04.04/ эцсийн шийдвэр гарлаа. Хэдэн сар үргэлжилсэн үймээн самуун, шүүх хурлуудын дараа Юн Сук Ёлын түүхэн импичментийн үлгэр дуусч, албан ёсоор огцорч байна.

Юн Сук Ёлыг дэмжигчид эсэргүүцлээ илэрхийлэн, шүүхийн шийдвэрийг "огтоос хүлээн зөвшөөрөх боломжгүй" гэжээ. Жагсагч 60 настай Ким Ёнтэ "Энэ бол Солонгосын нийгэм бүрэн нуран унаж буйн дохио. Иргэд ардчиллыг сэргээж, улс орондоо эрх чөлөөг авчрахын тулд босох ёстой. Илт авлигад автсан шүүгчдийг өршөөхгүй" гэжээ. Мөн өөр нэгэн эмэгтэй жагсагч "Худалч амьтад. Шүүгч нар бүгд худалч" гэж хашгирчээ.

Импичмент зарласан цагаас хойш Өмнөд Солонгост үймээн самуун үргэлжилсэн. Юныг дэмжсэн гэлтгүй эсэргүүцсэн жагсагчид ч олон байсан. Үндсэн хуулийн цэц шийдвэрээ зарласны дараа жагсагчид ч бас сэтгэл хөдлөлөө хоёр янзаар илэрхийлж байна. Юныг эсэргүүцэж байсан олон баярын уухай хашхиралдаж байна.

Энэ тухай "BBC"-ийн сурвалжлагч газар дээрээс нь мэдээлэхдээ "Өмнөд Солонгос хэзээ нэгэн цагт ДАШТ-д түрүүлбэл л ийм үзэгдэл болох байх. Төв талбайд зурагтаар шууд мэдэгдлийг үзэж суусан олон эцсийн шийдвэрийг уншиж дуусмагц хожлын гоол оруулсан мэт үсэрч харайцгаасан. Иргэд энд тэнд дуулж бүжиглэж байна" гэв.

Сөрөг хүчний Ардчилсан нам өнөөдрийн үйл явдлыг "Өмнөд Солонгосын ард түмний агуу ялалт" гэж нэрлэжээ. Харин эрх баригч Ардын хүч нам шүүхийн шийдвэрийг хүлээж авна гэдгээ мэдэгдээд, ард түмнээс өршөөл эрсэн байна.

Ерөнхийлөгчийн импичмент гэх мэт ийм чухал шийдвэрийг зарлах үед олон нийтийн төлөөллийг байлцуулдаг журам Өмнөд Солонгост байдаг. Шийдвэрийг шууд дамжуулж байгаа ч гэлээ цөөн тооны иргэн биечлэн байлцдаг. Энэ удаад 20 хүнд боломж олгосон бөгөөд 20 суудлын төлөө 90 мянга гаруй хүн хүсэлт гаргажээ. 2017 онд өмнөх ерөнхийлөгчийг огцруулах шийдвэрийг зарлах үеэр 24 суудлын төлөө 19 мянга гаруй хүн өрсөлдөж байв.

Ийнхүү Юн Сук Ёл огцорсон тул дараагийн ерөнхийлөгчийг 60 хоногийн дотор сонгох ёстой болж байна. Чухам хэдний өдөр сонгууль явуулахыг ерөнхийлөгчийн үүрэг гүйцэтгэгч Хан Дак Сү 10 хоногт багтаж зарлана.