Чеченийн удирдагч Рамзан Кадыров Даваа гаригт 17 настай хүүгээ Дотоод хэргийн яамны хянагчийн албан тушаалд томилов. Ингэснээр Адам Кадыров цагдаа болон орон нутгийн аюулгүй байдлын хүчнийг удирдах болж байна. Тус яам нь мөн терроризм, үймээн самуунтай тэмцэх ажлыг хариуцдаг.

Кадыровын гурав дахь хүү Адам ёслолын хувцастай сүр дуулиантайгаар албан тушаалаа хүлээн авч буйг зурагтаар шууд дамжуулжээ. Албан тушаалаа хүлээж авсан даруйдаа хүү шинэ томилгоо хийж, цагдаагийн ажилтнуудад одон гардуулж, шууд ажилдаа орсон байна.

Адам Кадыров өнгөрсөн оны дөрөвдүгээр сард Чеченийн Оросын тусгай хүчний их сургуулийн ахлагчаар томилогдсон. Энэ сургууль нь энгийн иргэд болон цэргүүдэд их буутай ажиллах, шүхрээр буух зэрэг ур чадварыг эзэмшүүлдэг.

Адамын бага нас дайн дажинтай цаг үед өнгөрсөн. Хүү 2023 оны есдүгээр сард буюу 15-хан настайдаа Коран судар шатаасан хэрэгт буруутгагдаж буй хоригдлыг зодож, өшиглөсөн нь багагүй шуугиан тарьсан билээ. ОХУ-ын хүний ​​эрхийн албаныхан болсон явдалд санаа зовниж буйгаа илэрхийлсэн ч Рамзан Кадыров эсрэг байр суурьтай байсан юм. Адамын бичлэг цахим ертөнцөд тарсны дараа Рамзан Кадыров хүүгээ харин ч магтаж, зөв зүйл хийсэн гэжээ.

Энэ үйл явдлын дараахан Адам Кадыров Чеченийн "Бүгд найрамдах улсын баатар" медалиар шагнагджээ. Түүнд Чеченийн төр засгаас дор хаяж найман төрлийн шагнал, гавъяа олгосон байдаг.

2023 оны арваннэгдүгээр сард 16 нас хүрэхийнхээ тэр эцгийнхээ хамгаалалтын албаны даргаар томилогдов. Энэ томилгоо нь түүнийг Оросын хамгийн залуу хамгаалалтын албаны дарга болгож, Оросын дээд амжилтын номд нэрийг нь гаргасан юм.

Дээрх баримтуудаас улбаалаад өсвөр насны хүүг эцгийнхээ орыг залгамжлах нь гэсэн цуу яриа тарсан. Мөн Кадыровын биеийн байдал тааруу байж магадгүй гэх таамаг ч үүссэн. Оросын "Новая газета" хэвлэл өнгөрсөн оны дөрөвдүгээр сард Рамзан Кадыровыг бөөр, нойр булчирхайн асуудалтай тэмцэлдэж байж магадгүй гэж мэдээлсэн билээ.