Хятадын Үндэсний компьютерийн вирусын халдвараас урьдчилан сэргийлэх, хянах технологийн үндэсний инженерийн лаборатори Пүрэв гаригт (2025.04.03) Харбин хотод болсон Азийн өвлийн IX наадмын үеийн тайланг нийтэлжээ. Уг тайланд хоёрдугаар 7-14-ний хооронд болсон Азийн өвлийн наадмын мэдээллийн системд 270 мянга гаруй удаа халдлага үйлдэх гэж оролдсон гэж бүртгэгджээ. Мөн дийлэнх нь АНУ-ын явуулсан цахим халдлага байсан гэж онцлон тэмдэглэгдсэн байна.

Тодорхойлогдсон халдлагын 170864 нь АНУ-аас ирсэн бөгөөд энэ нь нийт халдлагын 63 хувь бол Сингапураас 14.97 хувь, Нидерланд 4.95 хувь, Герман 2.47 хувь, Өмнөд Солонгос 0.47 хувь байна.

Статистикийн мэдээгээр Азийн өвлийн наадмын үеэр нийт 12602 өндөр эрсдэлтэй вирус тараадаг "IP" хаягийг хориглож чаджээ. Мэргэжилтнүүдийн үзэж буйгаар, АНУ нь Хэйлунжан мужийн мэдээллийн чухал дэд бүтцэд халдах олон IP хаягтай байсан тул нийт халдлагын тоо бусад орноос ирэх халдлагаас харьцангуй өндөр байжээ. Түүнчлэн уг тайланд дурдсанаар Америкийн тагнуулын агентлагууд Хятадын технологийн томоохон аж ахуйн нэгжүүдийн эсрэг кибер халдлага үйлдэхдээ Нидерланд, Герман зэрэг Европын орнуудад байрлах "cloud" системийг ашигладаг байна.

Хятадын кибер аюулгүй байдлын алба эдгээр халдлагийн эх сурвалжийг тодорхойлох гэж оролдож байгаа ч АНУ-ын засгийн газрын дэмжлэгтэй байсан гэж сэжиглэж буй. Мөн олон улсын спортын арга хэмжээний үеэр цахим халдлага үйлдэж буйг гүнээ буруутгаж, олон нийтийн аюулгүй байдалд халдсантай адил гэж үзэж буйгаа мэдэгджээ.