"NEWS"агентлаг залуустаа зориулсан “Шинэ нэр” булангийнхаа ээлжит зочноор Ой тогтоолтын хамгийн залуу дэлхийн аварга, Олон улсын их мастер, оюуны спортоор Гиннесийн рекорд эзэмшигч Э.Үүрийнцолмонг онцолж байна. Тэрбээр Ой тогтоолтын ДАШТ-ний насанд хүрэгчдийн ангилалд 14 насандаа тэргүүлж, 33 жилийн түүхтэй тус тэмцээний хамгийн залуу дэлхийн аварга болжээ. Түүнчлэн 2022 оны бага насны Дэлхийн аварга, 2023 оны өсвөрийн Дэлхийн аварга, 2024 оны өсвөр болон насанд хүрэгчдийн Дэлхийн аваргын амжилтыг эзэмшдэг. Түүнийг 2024 онд үндэсний болон олон улс, тив дэлхийн түвшинд онцгой амжилт гарган, эх орноо сурталчлан, үе тэнгийнхнээ манлайлсныг үнэлэн 2024 оны "Оны онцлох хүүхэд”-ээр шалгаруулсан юм. Ингээд түүнтэй танилцъя.

ЭНХЖАРГАЛ ҮҮРИЙНЦОЛМОН: 2010.03.05

Одоо суралцаж буй сургууль:

Оюуны Ирээдүй

Сошиал хуудас:

Uuriin Tsolmon /фэйсбүүк/

uuriintsolmon___/Instagram/

-ОЙ ТОГТООЛТЫН ДАШТ-Д ТҮРҮҮЛСЭНД БАЯР ХҮРГЭЕ. ХАМГИЙН ЗАЛУУ ДЭЛХИЙН АВАРГААР ТОДРОХ МЭДЭЭЖ ГОЁ БАЙСАН БАЙХ. ГЭХДЭЭ ТЭР ОЛОН ЦИФР ТОГТООХ ХЭЦҮҮ БАЙДАГ УУ?

-Маш их баярлалаа. Өнөөдрийг хүртэл олон тэмцээн уралдаанд оролцсон. Тэмцээнд оролцох бүртээ өөртөө итгэлтэй байхыг чухалчилдаг. Үргэлж би зорилгоо биелүүлнэ, чадна гэсэн бодолтой оролцдог. Хамгийн сүүлд оролцсон тэмцээний тухайд 30 минутанд 6465 цифр цээжлэн, алдаагүй санаж шинэ амжилт гаргасан. Оюуны спортоор хичээллэхэд тархинд маш их ачаалал ирдэг. Гэхдээ оюуны спортын тамирчид яваандаа тархины ачааллаа удирдах чадварыг эзэмшдэг гэж би боддог.

-ТЭМЦЭЭНД ОРОЛЦОХДОО ХЭР ХУГАЦААНД БЭЛДДЭГ ВЭ. ЭСВЭЛ БАЙНГЫН БЭЛТГЭЛТЭЙ БАЙДАГ УУ?

-Дэлхийн аваргын тэмцээнд оролцох шигшээ багийн тамирчид амралтын газарт очоод, гар утсаа хураалгаад 14 хоногийн эрчимжүүлсэн бэлтгэл хийдэг. Би Монголын оюун ухааны академийн Дарханы салбарт харьяалагддаг. Эрчимжүүлсэн бэлтгэл хийхийн өмнө, Дархандаа аль хэдийн бэлтгэлээ хийгээд эхэлчихсэн байдаг. Ер нь аравдугаар сараас эхлээд л өөрийнхөө эрчимжүүлсэн бэлтгэлийг багш нартайгаа хамтраад хийж эхэлдэг.

Миний хувьд бүх зүйл дээр бодлын хүчийг ашигладаг. Анх энэ талаар Б.Баасандорж багш маань тайлбарлаж өгч байсан.

Тэмцээн дээрээ өөрийнхөө төлөвлөснөөр цээжлээд, ямар ч асуудалгүй санаж байгаагаа, сүүлд нь баярлаад багшдаа хэлээд инээж байгаагаа гэх мэт нэг нэгэнгүй бүгдийг нь яг л кино шиг бодол дотроо өдөр бүр дахин дахин төсөөлдөг. Энэ үнэхээр хүчтэй арга шүү.

-ЯАГААД ОЮУНЫ СПОРТЫГ СОНИРХОХ БОЛСОН ЮМ БЭ?

-Би анх цэцэрлэгт байхдаа оюуны спортын нэг төрөл болох спорт өрөлтөөр хичээллэж эхэлсэн. Тэгээд энэ төрлөөрөө тэмцээнд орохоор Дарханаас хотод ирсэн юм. Ингэж л анх Монголын оюун ухааны академитай танилцсан. Харин 2022 оноос оюун ухааны академийн бүх төрлөөр хичээллэж, ой тогтоолтын спортын тамирчин болсон. Дунд нь 1-2 жил орчим завсарлага авсан. Гэхдээ академийн хамт олон маань үнэхээр гоё байсан учраас буцаж орж байсан. Түүнээс хойш өнөөдрийг хүртэл тууштай хичээллэж байна. 

-АНХНЫ ТЭМЦЭЭН

-Миний анхны тэмцээн Winter-2022 улирлын аварга шалгаруулах тэмцээн байсан. Тэр үед бага насны ангилалд өрсөлдөж, нийлбэр оноогоор хоёрдугаар байрт орсон. Тиймээс дараагийн удаа заавал нэгдүгээр байрт орно гэж бодоод бэлтгэл хийсэн. Тэгж бэлдсэнийхээ ачаар улсын аварга шалгаруулах “Оюуны наадам-2022” тэмцээний бага насны ангиллын аварга болж байсан.

-ЧУХАЛ ТЭМЦЭЭНИЙ ӨМНӨ ӨӨРИЙГӨӨ ХЭРХЭН БЭЛДДЭГ ВЭ?

-Тэмцээний өмнө хамгийн чухал нь миний хувьд чанартай нойр байдаг. Өмнөх өдөр нь хамгийн оройдоо л гэхэд 22:00 цагт унтдаг. Тэгээд өөрийгөө цоглог байлгахын тулд дуу сонсох, үсрэх гэх мэт зүйлсийг хийдэг. Яг ширээнийхээ ард суугаад өмнөх шигээ бодлын хүчээ ашиглан амжилттай цээжлээд санаж буйгаа төсөөлдөг.

-ХАМГИЙН ДУРСАМЖТАЙ ТЭМЦЭЭН

-Миний хамгийн дурсамжтай тэмцээн гэвэл 2024 оны Дэлхийн аварга байсан. Яагаад гэвэл энэ тэмцээний үеэр олон хүмүүстэй танилцаж маш сайхан дурсамжуудыг бүтээсэн. Магадгүй үүнийг насан туршдаа санаж явах байх.

-ОЛОН ТЭМЦЭЭНИЙ ТУРШИД ХАМГИЙН ХҮЧТЭЙ ӨРСӨЛДӨГЧ ЧИНЬ ХЭН БАЙСАН БЭ?

-Би Наранзул гэдэг тамирчинг онцолж хэлмээр байна. Түүний өөрийгөө удирдах чадвар нь үнэхээр сайн, маш хичээнгүй тууштай тамирчин. Гэхдээ бид хоёр эелдэгээр өрсөлддөг байсан гэж хэлж болно. Хамтдаа сайжирч, хамтдаа хичээдэг.

-ҮЛГЭР ЖИШЭЭ АВДАГ ТАМИРЧИН

-Тэнүүн эгчээсээ үлгэр жишээ авдаг. Өөрийгөө удирдаж байгаа чадвар нь болон өөрийгөө үнэлэх чадвар нь маш сайн хөгжсөн санагддаг.

-ЧӨЛӨӨТ ЦАГААРАА ЮУ ХИЙХ ДУРТАЙ ВЭ? 

-Би чөлөөт цагаараа хүртэл бэлтгэлээ л хийдэг байсан. Гэхдээ сүүлийн үед бүжгийн спортод сонирхолтой болж байгаа. Ялангуяа чөлөөт, латин, цэнгээт бүжиг их сонирхолтой санагддаг.

-СУРГУУЛИА ТӨГСӨӨД ЯМАР МЭРГЭЖИЛТЭЙ БОЛОХЫГ ХҮСДЭГ ВЭ?

-Одоогоор мэргэжлээ нууцалж байгаа.

-ОЙРЫН ТӨЛӨВЛӨГӨӨ

-Өөрийн гэсэн брэндээ үүсгэх гээд ажиллаж байна. Төлөвлөгөөгөө гаргачихсан, түүнийхээ дагуу хичээгээд л явж байна даа.

-ТАНЫ ИРЭЭДҮЙН ЗОРИЛГО, ХҮСЭЛ МӨРӨӨДӨЛ

-Дэлхийн хамгийн залуу тэрбумтан болохыг мөрөөддөг. Энэ зорилгодоо хүрчхээд эргээд ярилцлага өгөх байх гэж итгэж байна.

-ОЮУНЫ СТОРТООР ХИЧЭЭЛЛЭДЭГ, ХИЧЭЭЛЛЭХ ХҮСЭЛТЭЙ ХҮҮХДҮҮДЭД ӨГӨХ ЗӨВӨЛГӨӨ

-Эхлээд оролдож үз. Чи хэзээ ч харамсахгүй. Хэрвээ чи "Надад энэ спорт таалагдаж байна, би бэлтгэл хийж байхдаа жаргалтай байна" гэж бодож байвал өөрийн төлөвлөгөөгөө гаргаад юу ч болсон хамаагүй зурсан замаараа яв. Чи чадна. Чи шинэ түүхийг бүтээнэ. Мөн үеийн тэнгийн хүүхдүүддээ хандаж хэлэхэд, магадгүй одоо чамайг хэн ч ойлгохгүй, хэн ч дэмжихгүй мэт санагдаж, бүх зүйл бүтэхгүй байгаа юм шиг хэцүү байж болох юм. Гэхдээ битгий шантраарай бүх зүйлд утга учир бий. Хорвоо ертөнц чамд маш том жаргалыг бэлдчихээд, чамайг үүнийг хүртэх эрхтэй эсэхийг шалгаж байна гэж бодох хэрэгтэй. Тиймээс хүчтэй байгаарай, урам зоригоо хэзээ ч битгий алдаарай. Чи чадна аа гэж хэлмээр байна.