Хүнсний бүтээгдэхүүний сар бүрийн үнийн статистикийг харвал гурил болоод махны үнэ хамгийн өндөр хэлбэлзэлтэй байдаг. Өнгөрсөн 2023, 2024 оны өвөлжилт, хаваржилт хүнд байж, хөдөө аж ахуйн салбарт нэг тэрбум орчим ам.долларын хохирол учирсан талаар Хүнс, хөдөө аж ахуй хөнгөн үйлдвэрийн сайд Ж.Энхбаяр мэдээлсэн. Уг хохирлыг бууруулахын тулд УИХ шийдвэр гаргаж, гурилын болон улаанбуудайн малын тэжээлийг татваргүй оруулж, үнийн хөөрөгдлийг барих зохицуулалтын арга хэмжээг авч байсан юм.

Энэ хугацаанд 65 мянга гаруй тонн гурил татваргүй орж ирсэн.

Уг арга хэмжээ нь тухайн үед үүссэн нөхцөл байдлыг тогтворжуулахад чухал нөлөө үзүүлсэн. Гэсэн ч гадаадаас импортын улаанбуудай, гурил авснаас үүдэж дотоодын үйлдвэрүүдэд сөргөөр нөлөөлсөн. Тухайлбал, улаанбуудайн тариалалт багасч, гурилын үйлдвэрлэл буурсан буюу 3-4 үйлдвэр үйл ажиллагаагаа зогсоосон. Мөн дахин 3-4 үйлдвэр үүд хаалгаа хаахад хүрсэн юм. Тиймээс улаанбуудай, малын тэжээлээ өмнөх импортын татварын дагуу авах нь зөв гэж үзэж Хүнс, хөдөө аж ахуй, хөнгөн үйлдвэрийн сайд Ж.Энхбаяр Гаалийн албан татвараас чөлөөлөх тухай хуулийг хүчингүй болсонд тооцох тухай хуулийн төслийг өргөн мэдүүлсэн юм. Уг хуулийн төслийг энэ хаврын чуулганаар хэлэлцэж, хаврын тариалалтын өмнө шийдэх хүлээлттэй байгаа юм.

Гурил үйлдвэрлэгчдийн зүгээс "Улаанбуудай, гурилын үнэ, гаалийн албан татварыг Засгийн газар эргэж харах ёстой. Өнөөдрийн байдлаар үйлдвэрүүдийн хүчин чадал 30-50 хувь буурч, сул зогсолт их болж, цалин, хөлс олгоход хүндрэл учирч байна. Үйлдвэрүүд бүрэн хүчин чадлаараа ажиллаж чадахгүй болсон гол шалтгаан нь гурилын борлуулалт буурсантай шууд холбоотой. Тиймээс импортоор орж ирж буй гурилын тоо хэмжээ чухал нөлөө үзүүлж буй тул дотоодын үйлдвэрлэгчдээ дэмжсэн шийдвэр хэрэгтэй" гэх байр суурийг илэрхийлсэн. 

• Дээдийн дээд зэрэг нь 4222 төгрөг,
• Дээд зэрэг нь 3193 төгрөг,
• 1-р зэрэг нь 2220 төгрөг,
• 2-р зэрэг нь 1358 төгрөг байна.