Хятадын Коммунист намын шийдвэр гаргах түвшний дээд байгууллага гэгддэг Улс төрийн товчооны хоёр гишүүн хоорондоо ажлын байраа солисныг Лхагва гаригт мэдээллээ. Тодруулбал, шашны болон үндэстний цөөнх, Хонгконг, Тайвань дахь намын нөлөөллийг төлөвлөдөг Нэгдсэн фронтын ажлын албаны дарга Ши Тайфэнг дотоод боловсон хүчний бүх шийдвэрийг хариуцдаг намын Зохион байгуулалтын хэлтсийн даргаар томилов. Эсрэгээрээ Зохион байгуулалтын хэлтсийн дарга байсан Ли Ганжэг Нэгдсэн фронтын ажлын албаны даргаар томилжээ.

Улс төрийн шатлалын энэ түвшинд урьд өмнө ийм өөрчлөлт хийж байгаагүйг шинжээчид онцолж байна.

Ямар нэгэн фракц, эрх мэдлийн бааз бий болгохгүйн тулд намын дээд албан тушаалтнууд, сайд нарыг шинэ албан тушаалд томилох нь бий. Гэсэн ч Улс төрийн товчооны гишүүдийн ажил солигдож буй нь Хятадын Коммунист намын түүхэнд байгаагүй зүйл юм. Сайд нарын хувьд энэ нь ер бусын зүйл биш. Харин Ши Тайфэн, Ли Ганжэ нар албан тушаалын хувьд хүнд жингийнхэн гэдгийг Сингапурын Үндэсний их сургуулийн дэд профессор Альфред Ву хэлжээ.

Ши Тайфэн, Ли Ганжэ нар 2022 онд Улс төрийн товчоонд дэвшсэн. Гэхдээ тэд Хятадын улс төрийн тогтолцооны эрх мэдлийн оргил болсон долоон гишүүнтэй Байнгын хорооны гишүүн биш юм.

Ши Жиньпин дарга сүүлийн хоёр жилийн хугацаанд улс төрийн цэвэрлэгээ эрчимтэй хийсэн. Цэвэрлэгээний улмаас Төв зохион байгуулалтын хэлтэс удирдах албан тушаалд нэр дэвшигчдийг хангалттай шалгаагүй гэж үзсэн байх магадлалтай.

Ши Тайфэн 68 настай. Тэрбээр 2022 оны аравдугаар сард Нэгдсэн фронтын ажлын албаны даргаар томилогдохоосоо өмнө Хятадын Нийгмийн шинжлэх ухааны академийн ерөнхийлөгчөөр ажиллаж байсан.

Харин 60 настай Ли нь Улс төрийн товчооны хамгийн залуу гишүүн бөгөөд цөмийн аюулгүй байдлын чиглэлээр мэргэшсэн технократ хүн юм.

Chinese Minister of Ecology and Environment Li Ganjie speaks at a news conference on the sidelines of the National People's Congress (NPC) in Beijing, China March 11, 2019. REUTERS/Stringer/File Photo